గుంటూరు- సికింద్రాబాద్ రైలు ఔరంగాబాద్ వరకు పొడిగింపు

రైతునగరం (నంద్యాల):  గుంటూరు-సికింద్రాబాద్ రైలును ఆదివారం నుంచి ఔరంగాబాద్ వరకు పొడిగించినట్లు దక్షిణ మధ్య  జోనల్ రైల్వే మెంబర్ జుబేర్ బాషా ఆదివారం ఒక ప్రకటనలో పేర్కొన్నారు. ఇక నుంచి గుంటూరు-ఔరంగాబాద్‌కు  రైలు నెం. 17253 మధ్యాహ్నం 12.15 గంటలకు నంద్యాల రైల్వే స్టేషన్‌కు చేరుకుంటుందని తెలిపారు. ఔరంగాబాద్-గుంటూరు రైలు నెం. 17254 మధ్యాహ్నం 3.05 నిముషాలకు నంద్యాల రైల్వే స్టేషన్‌కు వస్తుందన్నారు. ఔరంగాబాద్ నుంచి షిర్డీ 100 కి.మీ. ఉంటుందని, నంద్యాల ప్రాంత ప్రజలు షిర్డీ వెళ్లడానికి ఇదొక మంచి అవకాశమన్నారు. ఈ రైలును వచ్చే ఏడాది నాగర్సోల్ వరకు పొడగించనున్నామని, అక్కడ నుంచి షిర్డీ 40 కి.మీ. ఉంటుందన్నారు. ప్రజలు ఈ అవకాశాన్ని ఉపయోగించుకోవాలని కోరారు.