మిలీషియా సభ్యుడు లొంగుబాటు

చర్ల, న్యూస్‌టుడే: భద్రాచలం ఏఎస్పీ పరితోష్‌ పంకజ్‌ ఎదుట మంగళవారం మావోయిస్టు మిలీషియా సభ్యుడు మడవి జోగా లొంగిపోయాడు. సుక్మా జిల్లా జెట్టిపాడుకు చెందిన జోగా రెండేళ్ల కిందట మావోయిస్టు పార్టీకి చెందిన పుట్టపాడు మిలీషియా కమాండర్‌ మడకం దేవ దగ్గర సభ్యుడుగా చేరి పార్టీలో మిలీషియా సభ్యుడిగా కొనసాగుతున్నారు. పార్టీ సిద్ధాంతాలు నచ్చక జోగా లొంగిపోయారని ఏఎస్పీ వివరించారు. జిల్లా పోలీసుశాఖ చేపట్టిన ‘ఆపరేషన్‌ చేయూత’లో భాగంగా మావోయిస్టు నాయకులు, దళ సభ్యులు లొంగిపోతున్నారని పేర్కొన్నారు. మావోయిస్టు పార్టీ నుంచి జనజీవన స్రవంతిలోకి వస్తే ప్రభుత్వం తరపున అన్ని పునరావాసాలను కల్పిస్తామని ఏఎస్పీ తెలిపారు. సమావేశంలో ఏఎస్పీతోపాటు సీఐ రాజువర్మ పాల్గొన్నారు.