రౌతు లేని బండి రాజధానిలో సందడి

నాజూకు మెట్రోకు పరీక్షలు

చోదకుడి అవసరంలేని మెట్రో.. పట్టాలపై పరుగులు

బెంగళూరు (యశ్వంతపుర), న్యూస్‌టుడే : రాజధాని నగరంలో మెట్రో అభివృద్ధి పనుల జోరు వేగం పుంజుకుంది. చోదకుడి అవసరంలేని మెట్రో రైలు సంచార పరీక్షలను సంబంధిత విషయ నిపుణులు ముమ్మరంగా కొనసాగిస్తున్నారు. ఆ రైలు నిర్వహణకు సంబంధించి బీఎంఆర్‌సీఎల్‌ ఇంజినీరింగ్‌ నిపుణులకు చైనా నిపుణులు శిక్షణ ఇస్తున్నారు. నగరంలోని ఆర్‌.వి.రోడ్డు- బొమ్మనహళ్లి మధ్య 18.6 కిలోమీటర్ల పొడవునా ఈ నాజూకు వాహనం పరుగులు తీయనుంది. వీటిని చైనా మెట్రో రైలు కార్పొరేషన్‌ అందజేసిన విషయం తెలిసిందే. నెల రోజులుగా దాని పనితీరు గమనిస్తూనే ఉన్నారు. రైలు గరిష్ఠ వేగం, కుదుపుల అంశం, అత్యవసరంగా ఆగడానికి ఉపకరించే సాంకేతికత, సిగ్నల్‌ వ్యవస్థకు స్పందించే సెన్సర్లు, విద్యుత్తు సరఫరా తదితరాలను పరిశీలిస్తున్నామని బీఎంఆర్‌సీఎల్‌ అధికారులు తెలిపారు. ఇప్పటికే 25 రోజులుగా ఇది పట్టాలపై పరుగులు తీస్తోంది. మరో 40 రోజులు పాటు పరీక్షలు కొనసాగుతాయి. ఈ యేడాది ఆఖరులోగానే ప్రజల సేవకు సిద్ధం చేస్తామని అధికారులు వెల్లడించారు. చైనా నుంచి మరో ఆరు రైళ్లు దిగుమతి చేసుకుంటారు. అవి వచ్చాక ఏకకాలంలో పనితీరు సరిచూస్తారు. ఆర్‌.వి.రోడ్డు- బొమ్మనహళ్లి మధ్య మెట్రోరైలు ప్రారంభిస్తే ఐటీ ఉద్యోగులతో పాటు హోసూరు ప్రాంతం వారికి ఉపకరించనుంది.