రాజన్న ఆలయ ఈవోగా వినోద్‌రెడ్డి బాధ్యతల స్వీకరణ

వేములవాడ, న్యూస్‌టుడే: ప్రసిద్ధ పుణ్యక్షేత్రమైన వేములవాడలోని శ్రీ రాజరాజేశ్వరస్వామి ఆలయ ఇన్‌ఛార్జి ఈవోగా వినోద్‌రెడ్డి సోమవారం బాధ్యతలు స్వీకరించారు. ఇక్కడ విధులు నిర్వహించిన కృష్ణ ప్రసాద్‌ అనారోగ్య కారణాలతో సెలవులో ఉండటంతో ఆయన స్థానంలో రామకృష్ణ గత నెల 30 వరకు అదనపు బాధ్యతలు నిర్వహించారు. కృష్ణప్రసాద్‌ తన సెలవును పొడిగించడంతో వినోద్‌రెడ్డిని ఇన్‌ఛార్జి ఈవోగా నియమిస్తూ దేవాదాయశాఖ కమిషనర్‌ ఉత్తర్వులు ఇచ్చారు. దీంతో ఆయన వేములవాడ చేరుకొని ముందుగా స్వామివారిని దర్శించుకొని ప్రత్యేక పూజలు చేశారు. అనంతరం కల్యాణ మండపంలో ఆయనకు ఆలయ అర్చకులు వేదోక్త ఆశీర్వచనం ఇచ్చారు. ఈ సందర్భంగా ఆయనను ఏఈవో శ్రీనివాస్‌ సత్కరించి స్వామివారి ప్రసాదం అందజేశారు. కార్యక్రమంలో ఈఈ రాజేశ్, డీఈ రఘునందన్, ఏఈవోలు హరికిషన్, ప్రతాప నవీన్, పర్యవేక్షకులు తిరుపతిరావు, నటరాజ్, మహేశ్, ప్రొటోకాల్‌ పర్యవేక్షకుడు శ్రీరాములు, ఈవో సీసీ శివ, ఆలయ సిబ్బంది, అర్చకులు పాల్గొన్నారు.