బల్దియా జాగాపై ప్రైవేటు జబర్దస్తీ!

అక్రమ ప్రకటనలతో రూ.కోట్ల ఆర్జన
హిమాయత్‌నగర్‌లో ఒకే రోజు వంద బోర్డులు

హిమయత్‌నగర్‌ రోడ్డు విభాగినిపై వెలిసిన ప్రకటనల బోర్డులు 

ఈనాడు, హైదరాబాద్‌: జీహెచ్‌ఎంసీ ఆస్తులతో ప్రైవేటు వ్యక్తులు రూ.కోట్లు సంపాదిస్తున్నారు. అక్రమ ప్రకటనల బోర్డుల ఏర్పాటుతోరూ.లక్షల్లో అద్దె వసూలు చేసుకుంటున్నారు. ఇటీవల ఓ ప్రైవేటు ఏజెన్సీ రాత్రికి రాత్రి హిమయత్‌నగర్‌ రోడ్డు పొడవునా వంద బోర్డులను ఏర్పాటుచేయడమే అందుకు నిదర్శనం. అధికారులు వాటిని తొలగించకూడదన్న ఉద్దేశంతో.. మేయర్‌ విజయలక్ష్మి ఫొటోలతో వాటిపై ప్రకటనలు వేయడం గమనార్హం.  ఇంత జరుగుతున్నా అధికారులు పట్టించుకున్న దాఖలాల్లేవు.

ఇవిగో ఉదాహరణలు..

• నారాయణగూడ పైవంతెన నుంచి మినర్వా హోటల్‌ వరకు ఆదివారం రాత్రి 100 లాలిపప్‌ ప్రకటనల బోర్డులు వెలిశాయి. వాటిపై అధికారులను వివరణ కోరితే.. అక్రమంగా ఏర్పాటుచేసిన విషయం తమ దృష్టికి రాలేదని అన్నారు.  
• ఐమాక్స్‌ రోడ్డు, జూబ్లీహిల్స్‌  రోడ్డులో ప్రకటనల బోర్డులు వందల్లో ఉన్నాయి. వాటికి సంబంధించిన కోర్టు కేసులో అధికారులు సరైన వాదనలు వినిపించడం లేదన్న ఆరోపణలున్నాయి.  

నిషేధం అందుకేనా.. : హోర్డింగులు, విభాగినులు, రోడ్లకు ఇరువైపులా ప్రమాదాలకు తావిచ్చే ఆయా ప్రకటనలను జీహెచ్‌ఎంసీ నిషేధించింది. దీంతో నగరవ్యాప్తంగా 1,500కుపైగా హోర్డింగులు ఖాళీ అయ్యాయి. అవినీతి అధికారుల అండదండలతో అనధికార హోర్డింగులు, బోర్డులు, ఇతర రకాల ప్రకటనలు పుట్టుకొస్తున్నాయి.