తెరుచుకున్న గుండ్లమడుగు తండా పాఠశాల

దస్త్రాలు పరిశీలిస్తున్న విద్యాధికారి వెంకటయ్య 

తాండూరు గ్రామీణ, న్యూస్‌టుడే: తాండూరు మండలం గుండ్లమడుగు తండా పాఠశాల ఎట్టకేలకు తెరుచు కుంది.‘ఈనాడు’లో..‘20 రోజులుగా పాఠశాల మూత’ శీర్షికన బుధవారం ప్రచురితమైన కథనానికి తాండూరు మండల విద్యాధికారి వెంకటయ్య స్పందించారు. పాఠశాల సముదాయ గెజిటెడ్‌ ప్రధానోపాధ్యాయులు వైద్యనాథ్‌తో కలిసి పాఠశాలకు వెళ్లి తెరిపించారు. ఇక్కడి ఉపాధ్యాయులు నారాయణ్‌రెడ్డి అనారోగ్యం కారణంగా సెలవుపై వెళ్లడంతో తాత్కాలికంగా ఉపాధ్యాయుడు సతీష్‌ను విధులకు నియమించామన్నారు. సతీష్‌ విధులకు గైర్హాజరవడంపై ఆగ్రహం వ్యక్తంచేశారు. ఆయనపై ఉన్నతాధికారులకు నివేదిస్తామన్నారు. తాజాగా ఆయన స్థానంలో ఉద్దండాపూర్‌ ప్రాథమికోన్నత పాఠశాలకు చెందిన ఉపాధ్యాయులు పండరిని డిప్యూటేషన్‌పై విధులకు నియమించారు. సెలవుపై వెళ్లిన ఉపాధ్యాయుడు వచ్చే వరకు ఇదే పాఠశాలలో పాఠాలు బోధించేందుకు ఆదేశించారు. అయితే  ఉపాధ్యాయులు లేని కారణంగా పిల్లల భవితపై తల్లిదండ్రులు ఆందోళన చెందారు. వారిని సమీపంలోని జిన్‌గుర్తి ప్రభుత్వ పాఠశాలలో చేర్పించారు.