ఆడుకుంటూ రైలెక్కి.. ఆపదలో చిక్కుకుని

ఓ ఆటోడ్రైవర్‌ అపహరణకు యత్నించగా రక్షించిన ట్రాఫిక్‌ పోలీసులు

కాటేదాన్, న్యూస్‌టుడే: ఎటువెళ్తున్నారో తెలియకుండానే ఆడుకుంటూ రైలెక్కిన చిన్నారులు.. గమ్యం తెలియక మరో స్టేషన్‌లో దిగి బయటకు వెళ్తుండగా ఓ ఆటో డ్రైవర్‌ వారిని అపహరించడానికి యత్నించగా ట్రాఫిక్‌ పోలీసులు రక్షించారు. ఈ సంఘటన మంగళవారం మైలార్‌దేవుపల్లి డివిజన్‌లో చోటుచేసుకుంది. రాజేంద్రనగర్‌ ట్రాఫిక్‌ ఇన్‌స్పెక్టర్‌ బిల్లా కిరణ్‌కుమార్‌ తెలిపిన వివరాల ప్రకారం... కార్తిక్‌(6), అఖిల్‌(4) ఇద్దరు మంగళవారం మధ్యాహ్నం 3 గంటలకు బుద్వేల్‌ రైల్వేస్టేషన్‌లో శంషాబాద్‌ (ఉందానగర్‌)మీదుగా వచ్చే రైలునుంచి దిగారు. దారి తెలియని చిన్నారులు బయటకు వచ్చి కాలినడకన ఆరాంఘర్‌ చౌరస్తా దాటుతున్నారు. రాజేంద్రనగర్‌ ట్రాఫిక్‌ ఠాణా సమీపంలోకి రాగా ఓ ఆటోవాలా వారిని వెంబడిస్తూ అపహరించేందుకు ప్రయత్నిస్తుండగా అక్కడే విధులు నిర్వహిస్తున్న ట్రాఫిక్‌ కానిస్టేబుళ్లు యాదయ్య, వెంకట్‌రెడ్డి, శివలు గుర్తించి అప్రమత్తమయ్యే లోపే పరారయ్యాడు. వెంటనే ఇద్దరు చిన్నారులను చేరదీసి విచారించగా సరైన సమాధానం చెప్పలేదు. పెద్దబ్బాయి శంషాబాద్‌ నుంచి వచ్చినట్లు చెప్పడంతో అక్కడి పోలీసులను అప్రమత్తం చేశారు. ఇంతలో తమ పిల్లలు ఎక్కడికెళ్లారోనని గాలిస్తున్న శంషాబాద్‌ శివారున గుడిసెలో నివసించే మాతృమూర్తి శైలజ సమాచారం అందుకుని రాజేంద్రనగర్‌ ట్రాఫిక్‌ పోలీసులను ఆశ్రయించింది. ట్రాఫిక్‌ ఇన్‌స్పెక్టర్‌ ఆమెకు కౌన్సిలింగ్‌ చేసి పిల్లలను అప్పగించారు.