డెంగీ జ్వరాల కట్టడికి యత్నం

ఇంటింటి తనిఖీలకు జీహెచ్‌ఎంసీ ప్రత్యేక కార్యాచరణ

ఈనాడు, హైదరాబాద్‌: డెంగీ జ్వరాలను కట్టడి చేయాలని జీహెచ్‌ఎంసీ లక్ష్యంగా పెట్టుకుంది. అందుకు ప్రత్యేక కార్యాచరణను సిద్ధం చేసుకుంది. మంగళవారం అదనపు కమిషనర్, సికింద్రాబాద్‌ జడ్సీ రవికిరణ్‌ సమీక్ష నిర్వహించారు. ‘మొత్తం 4,846 కాలనీల్లో ప్రతి కార్మికుడు 6 రోజుల్లో 3 కాలనీల్లోని అన్ని ఇళ్లను పరిశీలించాలి. దోమలు పెరిగేందుకు ఆస్కారమున్న ప్రదేశాలను గుర్తించి మందు పిచికారీ చేయాలి. ప్రతి కాలనీలో ఆరు రోజులకోసారి ఫాగింగ్‌ జరగాలి. ఆ చర్యలను ఉన్నతాధికారులు తనిఖీ చేయాలి. డెంగీ సోకిన వారి ఇళ్లపై దృష్టి పెట్టండి. ఆదివారం ఉదయం 10 గంటలకు 10 నిమిషాలపాటు ఇంట్లో నీటి నిల్వలను తొలగించేలా ప్రచారం చేయాలి. ట్విట్టర్, ఫేస్‌బుక్, మైజీహెచ్‌ఎంసీ మొబైల్‌ యాప్, ఇతర మార్గాల్లో వచ్చే ఫిర్యాదులను వేగంగా పరిష్కరించాలి’ అని స్పష్టంచేశారు.