హైదరాబాద్‌లో ఐపీఎస్‌ వర్సెస్‌ ఎమ్మెల్యే..!

జూబ్లీహిల్స్, న్యూస్‌టుడే: నగరంలో ఓ ఐపీఎస్, ఎమ్మెల్యే మధ్య వ్యవహారం అటు పోలీసు శాఖలో అటు ప్రజా ప్రతినిధులలో చర్చనీయాంశం అవుతోంది. విశ్వసనీయ సమాచారం మేరకు.. నగరంలోని సంపన్నుల ప్రాంతంలో నివసించే ఓ ఎమ్మెల్యే ఇటీవల విదేశీ పర్యటనకు వెళ్లారు. ప్రభుత్వం ఆయనకు కేటాయించిన గన్‌మెన్లు ఎమ్మెల్యే ఇంటి వద్దనే ఉంటున్నారు. ఈ విషయంపై దృష్టి పెట్టిన ఒక ఐపీఎస్‌ ఎమ్మెల్యే లేని కారణంగా గన్‌మెన్లను పోలీసు కార్యాలయంలో రిపోర్ట్‌ చేయాలని సూచించారు. ఈ విషయం తెలుసుకున్న ఎమ్మెల్యే విదేశాల నుంచి నేరుగా సదరు అధికారికి ఫోన్‌ చేశారు. తాను లేకున్నా.. తన కుటుంబ సభ్యులున్నారని, వారికి రక్షణ కావాలి కదా.. అన్నారు. అందుకు ఐపీఎస్‌  ససేమిరా అన్నారు. గన్‌మెన్లను కార్యాలయంలో రిపోర్ట్‌ చేయాలని తేల్చిచెప్పారు. దీంతో ఎమ్మెల్యే చిన్నబుచ్చుకున్నారు. తాను తిరిగి వచ్చిన తరువాత ఈ విషయం తెల్చుకోవడానికి సిద్ధమవుతున్నారు. అసలే.. ముప్పు ఉన్న ఎమ్మెల్యే కావడంతో ఈ విషయపై ఇరువర్గాల్లోనూ చర్చ జరుగుతోంది.