అడుగడుగునా ఆప్యాయంగా పలకరిస్తూ..

తనకు ఇల్లు మంజూరు చేయాలని సీఎం చంద్రబాబును వేడుకుంటున్న నరసమ్మ

ఈనాడు, అమరావతి, తాడేపల్లి, న్యూస్‌టుడే: బాణావత్‌ పాములు కుటుంబానికి పింఛను పంపిణీ తర్వాత గ్రామంలోని కూడలిలో అంగన్‌వాడీ కేంద్రం వద్ద ఏర్పాటు చేసిన ప్రజావేదికకు కాలినడకన చంద్రబాబు బయలుదేరారు. ఈ క్రమంలో స్థానికులు చంద్రబాబును కలిసి వారి సమస్యలు విన్నవించారు. ఓ మహిళ తన కుమారులను చూపి వారికి ఆర్థిక సహాయం చేయాలని వేడుకున్నారు.

• అదే మార్గంలో నరసమ్మ అనే వృద్ధురాలు రోజువారీ కూలి చేసుకుంటూ జీవనం సాగిస్తున్నానని, తనకు సొంత ఇల్లు లేదని, మంజూరు చేయాలని కోరారు. కూలి డబ్బులు జీవనానికే సరిపోతున్నందున, ఇంటికి సాయం చేయాలని వేడుకుంది. భుజం తట్టి సమస్య పరిష్కరిస్తానని భరోసా ఇచ్చారు.
• ఓ వృద్ధురాలు తనకు పింఛను ఇప్పించమని కోరింది. వీధిలో అందరినీ పలకరిస్తూ వెళ్తున్న సీఎంను చూసి గ్రామస్థులు ఆనందం వ్యక్తం చేశారు. ప్రజావేదిక వద్దకు బాబు చేరుకోగానే జైబాబు జైజై బాబు అంటూ కార్యకర్తలు పెద్దఎత్తున నినాదాలు చేశారు.
• ముఖ్యమంత్రి చంద్రబాబును వేదికపైకి తెదేపా మండల అధ్యక్షుడు అమరా సుబ్బారావు ఆహ్వానించారు.  6.52గంటలకు వేదికపైకి వచ్చిన సీఎం చంద్రబాబు ప్రసంగించడంతో పాటు వేదిక ఎదుట కూర్చున్నవారిని మాట్లాడించారు. వారి సమస్యలు తెలుసుకున్నారు. కొందరు మహిళలు అడిగిన ప్రశ్నలకు సమాధానాలు చెప్పారు.
• గ్రామంలో టిడ్కో ఇళ్ల సముదాయంలో తాగు నీటి సమస్య పరిష్కరించాలని మహిళ ఒకరు కోరారు. తండాలో కొండ పొరంబోకు స్థలంలో ఇల్లు కట్టుకున్నవారికి పట్టాలు ఇవ్వాలని కోరారు. శ్మశానం, కమ్యూనిటీ హాల్, సీసీ రోడ్లు నిర్మించాలని నాగారాజు నాయక్‌ కోరారు.