ప్రయాణికుల ఆకాంక్షలకు అనుగుణంగా సేవలు

మాట్లాడుతున్న అరుణ్‌ కుమార్‌ జైన్, పక్కన రామకృష్ణ, సైమన్‌ తదితరులు

గుంటూరు రైల్వే, న్యూస్‌టుడే: ప్రయాణికుల ఆకాంక్షలకు అనుగుణంగా సదుపాయాలు కల్పించేందుకు ప్రాధాన్యం ఇవ్వాలని ద.మ.రైల్వే జీఎం అరుణ్‌ కుమార్‌ జైన్‌ సూచించారు. గుంటూరులోని రైల్‌ వికాస్‌ భవన్‌లో సోమవారం అధికారులతో నిర్వహించిన సమీక్ష సమావేశంలో అరుణ్‌ కుమార్‌ జైన్‌ మాట్లాడుతూ అంతర్గత వనరుల్ని గరిష్ఠంగా సద్వినియోగం చేసుకొంటూ సరకు రవాణాలో వాటా పెంపొందించుకోవాలని కోరారు. నిర్వహణ నిష్పత్తి మరింత దిగివచ్చేలా చూడడమే లక్ష్యంగా పని చేయాలన్నారు. ప్రయాణ భద్రత, పట్టాల మార్పిడి, వంతెనల నిర్మాణాలు, మరమ్మతులు తదితరాలపై రూపొందించిన క్యాలెండర్‌ను పకడ్బందీగా అమలయ్యేలా చూడాలన్నారు. సమావేశంలో డీఆర్‌ఎం రామకృష్ణ, ఏడీఆర్‌ఎం సైమన్, సీనియర్‌ డీఈఎన్‌(కోఆర్డినేషన్‌) అనూష, సీనియర్‌ డీవోఎం దినేష్‌కుమార్‌ తదితరులు పాల్గొన్నారు.