Somu Veerraju: ఈవీఎంలను తప్పుపట్టడం హాస్యాస్పదం: సోము వీర్రాజు

మాట్లాడుతున్న వీర్రాజు

దేవీచౌక్‌: ఇందిరాగాంధీ హయాం నుంచి కాంగ్రెస్‌ పార్టీ వైఖరి ఏ మాత్రం మారలేదని భాజపా జాతీయ కార్యవర్గ సభ్యుడు సోము వీర్రాజు అన్నారు. నగరంలోని పార్టీ కార్యాలయంలో శుక్రవారం విలేకరుల సమావేశంలో ఆయన మాట్లాడారు. ఈవీఎం ట్యాంపరింగ్‌ గురించి రాహుల్‌గాంధీ ప్రస్తావించడం, రాష్ట్రంలో కూడా తమకు అనుమానాలున్నాయని ఓడిపోయిన పార్టీ ప్రకటించడం హాస్యాస్పదమన్నారు. రాష్ట్ర ప్రజలు ఒక సంచలనమైన తీర్పు ఇచ్చారన్నారు. దాన్ని వైకాపా హుందాగా స్వీకరించాలని సూచించారు. వైకాపా ఎంపీలు అవినాష్‌ రెడ్డి, మిథున్‌ రెడ్డిలు భాజపాలో చేరేందుకు ప్రయత్నిస్తున్నారు కదా అని ఒక విలేకరి ప్రశ్నించగా.. దానిపై తమకు ఎటువంటి సమాచారం లేదని సోము వీర్రాజు చెప్పారు. వారిని ఆహ్వానించేందుకు సిద్ధంగా లేమన్నారు. సమావేశంలో భాజపా జిల్లా అధ్యక్షుడు బొమ్ముల దత్తు, రాష్ట్ర ఉపాధ్యక్షురాలు రేలంగి శ్రీదేవి, ఇతర నాయకులు పాల్గొన్నారు.