YSRCP: ఇదేం వి‘చిత్రం’.. నవ్విపోరా జనం..!

న్యూస్‌టుడే, అమలాపురం గ్రామీణం: రాష్ట్రంలో ఎన్టీయే కూటమి ప్రభుత్వం అధికారంలోకి వచ్చినా.. నేటికీ గత వైకాపా ప్రభుత్వ లోగోలు, చిత్రాలు ఇంకా కనిపిస్తూనే ఉన్నాయి. అమలాపురంలోని ప్రాంతీయ ఆసుపత్రి భవనానికి గతంలో వేసిన మాజీ సీఎంలు వైఎస్‌ రాజశేఖరరెడ్డి, జగన్‌మోహన్‌రెడ్డి చిత్రాలతో ఉండే నవరత్నాలు లోగోలు మంగళవారం దర్శనమిచ్చాయి. వీటిని ఎన్నికల నియమావళి నేపథ్యంలో మూసేసి.. ఇటీవలే వాటి ముసుగులు తీసేయడం గమనార్హం. సర్కారు మారినా ఇంకా పాత చిత్రాలేంటని కూటమి నేతలు అభ్యంతరం వ్యక్తం చేస్తున్నారు. ఇప్పటికైనా సంబంధిత అధికారులు వాటిని తొలగించాలని కోరుతున్నారు.