ఏడీబీ రోడ్డు పనులు ముమ్మరం

గోవిందరాజపురం వద్ద మురుగు వెళ్లేందుకు పైపులైను ఏర్పాటుకు తవ్వుతున్న జేసీబీ 

రంగంపేట, న్యూస్‌టుడే: ఏడీబీ రోడ్డు విస్తరణ పనులు ఇక పూర్తిస్థాయిలో కొనసాగనున్నాయి. రాజానగరం, రంగంపేట మధ్య అత్యంత దయనీయంగా తయారైన ఈ రోడ్డు మరమ్మతుకు బీఎస్‌ఆర్‌ సంస్థ ఆదివారం చర్యలను చేపట్టింది. గోవిందరాజపురం, వెంకన్నపేట, వడిశలేరు, రామస్వామిపేటల వద్ద ఏర్పడిన భారీ గోతుల్లో మెటల్‌ వేసి పూడ్చే పనులు జరిగాయి. ఈ గోతుల వల్ల ఇక్కడ కిలోమీటర్ల మేర ట్రాఫిక్‌ నిలిచిపోయే పరిస్థితి ఉండేది. బురద, వర్షపు నీరు వెళ్లేందుకు భూమిలో పైపులైను ఏర్పాటు కోసం యంత్రాలతో కాలువను తవ్వారు. రెండు రోజులుగా కురుస్తున్న వర్షాలతో ఈ పనులకు తరచూ ఆటంకం కలిగింది. ముందుగా రోడ్డుపై నీరు నిల్వ లేకుండా చర్యలు చేపట్టి గోతులను పూడ్చే పనిలో సిబ్బంది నిమగ్నమయ్యారు. ఇపుడు తాత్కాలిక పనులపై దృష్టి సారించామని, క్రమక్రమంగా పనులు ముమ్మరం చేసి పూర్తిస్థాయిలో ఏడీబీ రోడ్డు విస్తరణ పనులు పూర్తి చేస్తామని ఆర్‌.అండ్‌.బి(ఆర్‌.డి.సి) డీఈ భాస్కర్‌ ‘న్యూస్‌టుడే’కి తెలిపారు.