శ్రీవారి సర్వదర్శనానికి 18 గంటలు

తిరుమల, న్యూస్‌టుడే: శ్రీవారి సర్వదర్శనానికి ఎటువంటి దర్శన టికెట్లు లేకుండా తిరుమలకు వచ్చిన భక్తులు గురువారం సాయంత్రానికి వైకుంఠం క్యూకాంప్లెక్స్‌లోని కంపార్ట్‌మెంట్లు, నారాయణగిరి షెడ్లు నిండిపోయి టీబీసీ వరకు క్యూలైన్‌లో వేచిఉన్నారు. వీరికి దాదాపు 18 గంటల్లో శ్రీవారి దర్శనం లభించనుందని తితిదే తెలిపింది. రూ.300 ప్రత్యేక ప్రవేశదర్శనం టికెట్లు కలిగిన భక్తులు ఐదు కంపార్ట్‌మెంట్లలో వేచిఉన్నారు. వీరికి దర్శనానికి మూడు గంటల సమయం పడుతోంది. బుధవారం శ్రీవారిని 69,632 మంది భక్తులు దర్శించుకున్నారు. రూ.3.32 కోట్ల హుండీ కానుకలు లభించాయి.