సీఎం ఫ్లెక్సీపై పేడ కొట్టిన దుండగులు

వైకాపా వారి పనేనంటూ తెదేపా నాయకుల ఆరోపణ

కుప్పం పట్టణం (శాంతిపురం): పింఛన్‌ సాయం పెంచి, నెల మొదటి రోజే అందించిన సందర్భంగా ఏర్పాటు చేసిన సీఎం నారా చంద్రబాబు ఫ్లెక్సీలోని ఆయన ముఖంపై గుర్తుతెలియని వ్యక్తులు పేడ కొట్టారు. ఈ ఘటన కడపల్లె గ్రామ సచివాలయం వద్ద గురువారం వెలుగు చూసింది. పింఛన్ల పంపిణీలో భాగంగా ఈ నెల 1న సచివాలయం వద్ద ముఖ్యమంత్రి ఫ్లెక్సీకి స్థానిక నాయకులు, లబ్ధిదారులు, అధికారులు క్షీరాభిషేకం చేశారు. తర్వాత ఫ్లెక్సీని అలాగే ఉంచారు. గురువారం ఉదయం సచివాలయ సిబ్బంది వచ్చి చూడగా ఈ విషయం వెలుగు చూసింది.. ఇవన్నీ వైకాపా ఆగడాలేనని తెదేపా నాయకులు నిరసన తెలిపారు. మంచి పేరును తట్టుకోలేక ఆ పార్టీ నాయకులు, కార్యకర్తలే ఇలాంటి ఘటనలకు పాల్పడుతున్నారని వైకాపా మండల కన్వీనర్‌ దండపాణి, అనుచరులపై అనుమానం ఉన్నట్లు రాళ్లబూదుగూరు పోలీసు స్టేషన్‌లో ఫిర్యాదు చేశారు. కేసు దర్యాప్తు చేస్తున్నట్లు ఎస్సై నరేష్‌ తెలిపారు. పోలీసులు పలువురు అనుమానితులను అదుపులోకి తీసుకున్నట్లు తెలిసింది.