‘పెద్దిరెడ్డి కుటుంబాన్ని బహిష్కరించాలి’

విలేకరుల సమావేశంలో తెదేపా నాయకులు 

చిత్తూరు(జిల్లా పంచాయతీ) : పెద్దిరెడ్డి రామచంద్రారెడ్డి కుటుంబాన్ని జిల్లా బహిష్కరణ చేయాలని తెదేపా రాష్ట్ర అధికార ప్రతినిధి సప్తగిరి ప్రసాద్, చిత్తూరు పార్లమెంటు నియోజకవర్గ ప్రధాన కార్యదర్శి కోదండయాదవ్‌ డిమాండ్‌ చేశారు. స్థానిక తెదేపా కార్యాలయంలో వారు మాట్లాడారు. రాజ్యాంగం గురించి మిథున్‌రెడ్డి మాట్లాడటం విడ్డూరంగా ఉందని, పెద్దిరెడ్డి రాజకీయ జీవితం ముగిసిన అధ్యాయమన్నారు. జిల్లాలో పెద్దిరెడ్డి కుటుంబం వల్ల శాంతిభద్రతలకు భంగం కలిగే ప్రమాదం ఉందన్నారు. ఐదేళ్లుగా పుంగనూరు నియోజకవర్గంలో అరాచకం సృష్టించిన పెద్దిరెడ్డి కుటుంబం, ప్రజలకు స్వేచ్ఛ లేకుండా చేశారని, రెండువేల మందిపై కేసులు పెట్టి అధికార దుర్వినియోగానికి పాల్పడ్డారని ఆరోపించారు.