పాసుపుస్తకం మంజూరుకు వినూత్న నిరసన

చెప్పులు మెడలో వేసుకుని నిరసన తెలుపుతున్న రైతు గంగన్న

కదిరి పట్టణం, న్యూస్‌టుడే: తమ కుటుంబీకుల నుంచి సంక్రమించిన భూమికి పట్టాదారు పాసుపుస్తకం మంజూరు చేయాలని కోరుతూ మంగళవారం కదిరి తహసీల్దార్‌ కార్యాలయం ఎదుట గంగన్న అనే రైతు చెప్పులు మెడలో వేసుకుని నిరసన చేపట్టారు. బాధిత రైతు తెలిపిన మేరకు వివరాలు.. కదిరికి చెందిన గంగన్న కుటుంబ సభ్యులకు బ్రిటీష్‌ పాలనలో కదిరి పొలంలో 3.03 ఎకరాల భూమికి పట్టా ఇచ్చారు. వర్షాభావ పరిస్థితుల కారణంగా కొన్నేళ్లుగా ఆ భూమిలో పంటలు పెట్టలేదు. దీన్ని అదనుగా చేసుకున్న కొందరు ఆ భూమిని ఆక్రమించారు. కబ్జాదారుల నుంచి కాపాడి పట్టాదారు పాసుపుస్తకం ఇవ్వాలని తహసీల్దార్‌ నుంచి కలెక్టర్‌ వరకు కోరుతున్నా స్పందించలేదని గంగన్న వాపోయారు. భూమికి సంబంధించిన రికార్డులన్నీ అధికారులకు అందజేసినట్లు తెలిపారు. ఇప్పటికైనా భూమిని సర్వేచేసి పట్టాదారు పాసుపుస్తకం ఇవ్వాలని కోరారు.