పింఛన్ల పంపిణీ ఇంటింటా నిర్వహించండి

మంత్రి పయ్యావుల కేశవ్‌

ఉరవకొండ, న్యూస్‌టుడే: కూటమి ప్రభుత్వం పెంచిన పింఛన్లను వృద్ధులకు ఇంటింటా పంపిణీ చేయాలని ఉరవకొండ నియోజకవర్గంలోని తెదేపా  శ్రేణులను రాష్ట్ర ఆర్థికశాఖ మంత్రి పయ్యావుల కేశవ్‌ ఆదేశించారు. ఈ కార్యక్రమంలో అధికారులు, సిబ్బందితో పాటు గ్రామ గ్రామాన పార్టీ శ్రేణులు పాల్గొనాలని సూచించారు. ఆదివారం ఆయన నియోజకవర్గంలోని పార్టీ నేతలతో టెలీకాన్ఫరెన్స్‌లో మాట్లాడారు. పింఛన్ల పంపిణీని పండగ వాతావరణంలో నిర్వహించాలన్నారు. ఉదయాన్నే పార్టీ శ్రేణులు గ్రామ సచివాలయాల వద్దకు చేరుకుని, సీఎం చంద్రబాబు చిత్ర పటానికి పాలాభిషేకం నిర్వహించి, ఇంటింటా పింఛన్లను అందించేలా చూడాలన్నారు. వైకాపా అనుసరించిన విధానాలకు భిన్నంగా ముందుకు సాగుతూ లబ్ధిదారులకు ఇళ్ల వద్దే వాటిని పంపిణీ చేసి, ప్రభుత్వ ప్రాధాన్యతను తెలియజేయాలన్నారు.

పాల్గొననున్న మంత్రి

పట్టణంలో సోమవారం నిర్వహించే సామాజిక భద్రతా పింఛన్ల పంపిణీ కార్యక్రమంలో మంత్రి పయ్యావుల కేశవ్‌ పాల్గొననున్నట్లు పార్టీ శ్రేణులకు చెప్పారు. పట్టణ నాయకులు రూపొందించిన ప్రణాళిక ప్రకారం ఆయన పాదయాత్రగా వెళ్తూ ఇంటింటా పింఛన్లు పంపిణీ చేయనున్నట్లు వివరించారు. ఈ కార్యక్రమంలో బొకేలు, పూలదండలు లాంటి కార్యక్రమాలకు దూరంగా ఉండాలని ఆయన పార్టీ శ్రేణులను కోరారు.