పోలవరం కుడి కాలువకు 2,832 క్యూసెక్కుల నీరు విడుదల

పోలవరం, న్యూస్‌టుడే: పట్టిసీమ ఎత్తిపోతల పథకం పంపుల ద్వారా పోలవరం కుడి కాలువలోకి విడుదల చేసిన నీరు గురువారం సాయంత్రానికి ఏలూరు జిల్లా ఉంగుటూరు మండల పరిధిలోకి చేరినట్లు జలవనరులశాఖాధికారులు చెప్పారు. మొత్తం ఎనిమిది పంపుల ద్వారా కుడి కాలువలోకి 2,832 క్యూసెక్కులు నీరు విడుదల చేస్తున్నట్లు పర్యవేక్షణ డీఈ పెద్దిరాజు తెలిపారు. గోదావరిలో నీటి మట్టం 14.74 మీటర్లుగా ఉన్నట్లు పేర్కొన్నారు. నది పరివాహక ప్రాంతాల్లో ఆశించిన స్థాయిలో వర్షాలు కురవకపోవడంతో గోదావరిలో నీటి మట్టం క్రమంగా తగ్గుతోంది. ప్రాజెక్టు స్పిల్‌వే వద్ద 26.39 మీటర్లుగా ఉంది. 48 గేట్ల నుంచి దాదాపు 50 వేల క్యూసెక్కులు దిగువకు వెళ్తున్నట్లు పర్యవేక్షణ ఈఈ పి.వెంకటరమణ చెప్పారు.