రైతుల డిమాండ్లు సాధించే వరకు పోరాటం

 మాజీ మంత్రి వడ్డే శోభనాద్రీశ్వరరావు

రామోజీరావు చిత్రపటం వద్ద నివాళులర్పిస్తున్న శోభనాద్రీశ్వరరావు గోపాలకృష్ణ, ఝాన్సీ, కేశవరావు, ప్రసాద్, రాజమోహన్‌ తదితరులు 

విజయవాడ(గాంధీనగర్‌), న్యూస్‌టుడే : రైతుల సమస్యలు పరిష్కారం అయ్యే వరకు పోరాటాలు, ఉద్యమాలు కొనసాగుతాయని మాజీ మంత్రి వడ్డే శోభనాద్రీశ్వరరావు స్పష్టం చేశారు. ఏపీ రైతు సంఘాల సమన్వయ కమిటీ ఆధ్వర్యంలో శనివారం ప్రెస్‌ క్లబ్‌లో నిర్వహించిన కార్యక్రమంలో ఆయన మాట్లాడారు. దిల్లీలో 14 నెలల పాటు నిర్వహించిన ఉద్యమం ఫలించిందన్నారు. రైతులకు ద్రోహం చేసిన భాజపాకు సీట్లు తగ్గాయన్నారు. కేంద్ర ప్రభుత్వం మనుగడ సాధించలేదని భాజపా బలం తగ్గడానికి రైతు ఉద్యమమే ప్రధాన కారణమని చెప్పారు.   నిజమైన రైతు సంఘాలతో కేంద్ర ప్రభుత్వం చర్చింకుండా గుర్తింపు లేని రైతు సంఘాలతో చర్చలు జరపడం విచారకరమన్నారు. పార్లమెంటులో రైతు సమస్యలు చర్చకు రాకపోవడంపై ఆవేదన వ్యక్తం చేశారు. జులై 10వ తేదీన న్యూదిల్లీలో జరిగే సమావేశానికి రైతులంతా హాజరుకావాలని పిలుపునిచ్చారు.  ఈ సందర్భంగా ‘రామోజీ’ గ్రూప్‌ సంస్థల అధినేత రామోజీరావు చిత్రపటానికి పూలమాలలు వేసి నివాళులర్పించారు. కార్యక్రమంలో రైతు సంఘం నాయకులు  వై.కేశవరావు, కె.వి.వి.ప్రసాద్‌సింహాద్రి ఝాన్సీ, ఆళ్ల గోపాలకృష్ణ, కె.నరేంద్ర, చుండూరు రంగారావు, డాక్టర్‌ కొల్లా రాజమోహన్, కూర ప్రసాద్, డి.హరనాథ్, ప్రసాద్‌బాబు, ఎం.వీరబాబు, అక్కినేని భవానీప్రసాద్, ఎం.హరిబాబు, బి.శ్రీనివాసులు, రాధాకృష్ణమూర్తి తదితరులు పాల్గొన్నారు.