పొంగిన వాగులు.. నిలిచిన రాకపోకలు

రాజవొమ్మంగి, న్యూస్‌టుడే: రెండు రోజులుగా మండలంలోని ఎగువ ప్రాంతంలో కురిసిన వర్షాలకు వాగులు పొంగి పొర్లాయి. వట్టిగెడ్డ జలాశయంలో నీరు అధికంగా చేరింది. నెల్లిమెట్ల శివారు చప్టాపై వాగు ఉద్ధృతంగా ప్రవహించడంతో పలు గ్రామాలకు రాకపోకలు నిలిచిపోయాయి. నెల్లిమెట్ల నుంచి నెల్లిమెట్ల కాలనీ, లబ్బర్తి, లాగరాయి, కిండ్ర, కిండ్ర కాలనీ, ముంజవరప్పాడు, అనంతగిరి, చీడిపాలెం, సమీప అడ్డతీగల మండలానికి రోజూ వందలాది మంది ఈ మార్గం మీదుగా రాకపోకలు సాగిస్తుంటారు. శాశ్వత వంతెన నిర్మించాలని ఎన్ని సార్లు అధికారులకు మొరపెట్టుకున్నా ఫలితం లేకపోయిందని స్థానికులు ఆవేదన వ్యక్తం చేస్తున్నారు.