నమ్మండి.. ఇది రహదారేనండి!

ముంచంగిపుట్టు, న్యూస్‌టుడే  : దారెల పంచాయతీలోని 14 గ్రామాలకు వెళ్లే రహదారి నిర్మాణం కంకరరాళ్లకే పరిమితమైంది. పేదపేట నుంచి పేటమాలిపుట్టు, కుమ్మరిపుట్టు, డీంగుడ కూడలి వరకు రహదారి నిర్మాణం ప్రారంభించి అసంపూర్తిగా వదిలేశారు. ఐదేళ్ల కిందట ప్రారంభించిన పనులు నేటికీ పూర్తికాలేదు. కంకర, పిక్కరాళ్లు రోడ్డుపై వేసి వదిలేశారు. దీంతో ప్రజలు రాకపోకలకు ఇబ్బందులు పడుతున్నారు. పేటమాలిపుట్టు గ్రామ రైతులు వారు సాగుచేసిన కూరగాయలను వారపు సంతకు తరలించేందుకు అవస్థలు ఎదుర్కొంటున్నారు. పేదపేట నుంచి తలింభా వరకు తారురోడ్డు నిర్మించాలని, కంకర పోసి వదిలేసిన చోట్ల పనులు పూర్తి చేయాలని అక్కడి ప్రజలు కోరుతున్నారు. నిధులు సరిపోక పనులు మధ్యలోనే నిలిచిపోయాయని, అదనపు నిధుల కోసం ప్రతిపాదనలు పంపించామని గిరిజన సంక్షేమశాఖ ఏఈ జబ్బర్‌ తెలిపారు. నిధులు మంజూరయ్యాక పనులు చేపడతామన్నారు.