వాగులు పొంగే... రాకపోకలు ఆగే..

దేవీపట్నం, న్యూస్‌టుడే: కొండవాగులు పొంగితే ఆ రెండు గ్రామాల గిరిజనులు బయట ప్రాంతాలకు వెళ్లడానికి తీవ్ర ఇబ్బందులు పడుతున్నారు. ఆదివారం రాత్రి కురిసిన వర్షానికి కొండవాగులు పొంగడంతో వెలగపల్లి-గుంపెనపల్లి గ్రామాల మధ్యలో ఉన్న సీతపల్లి వాగు ఉద్ధృతంగా ప్రవహించింది. ఎగువ ప్రాంతాల్లో కురుస్తున్న వర్షాలతో పోశమ్మగండి వద్ద గోదావరి క్రమంగా పెరుగుతోంది. పెరిగిన వరద ఉద్ధృతికి చినరమణయ్యపేట-దండంగి గ్రామాల మధ్య సీతపల్లి వాగులో పూర్తిగా రాకపోకలు నిలిచాయి. ఈ నేపథ్యంలో మండలంలోని వి.రామన్నపాలెం పంచాయతీ పరిధిలోని గుంపెనపల్లి, లక్ష్మీపురం గ్రామాల గిరిజనులు సోమవారం వాగు దాటలేక అవస్థలు పడ్డారు. వాగుపై వంతెన ఏర్పాటు చేసి కష్టాలు తీరేలా చర్యలు తీసుకోవాలని స్థానికులు కోరుతున్నారు. 

కాకరపాడు కష్టాలు తీరేలా కరుణించండయ్యా..

గూడెంకొత్తవీధి, న్యూస్‌టుడే: గూడెంకొత్తవీధి మండలం రింతాడ పంచాయతీ కాకరపాడుకు రహదారి కష్టాలు తీరేలా కరుణించండని ఆ గ్రామానికి చెందిన మామిడి భీమన్న, కాకరి మల్లేశ్వరరావు, భీమన్నలు సోమవారం ప్రభుత్వాన్ని కోరారు. గత వారం రోజులుగా కురుస్తున్న వర్షాలకు రోడ్డు రూపే మారిపోయింది. రాళ్లు తేలిపోయి, బురదమయంగా మారి రాకపోకలకు అవస్థలకు గురిచేస్తోంది. ఈ రోడ్డు విషయంపై ఎన్నోసార్లు వైకాపా పాలకులకు చెప్పినా కరుణించలేదు. కూటమి ప్రభుత్వమైనా తమ కష్టాలకు పరిష్కారాన్ని చూపాలని వారు కోరుతున్నారు.