CM Ramesh: అనతి కాలంలోనే అందరికీ ఆత్మీయుడైౖ.. చరిత్ర సృష్టించిన సీఎం రమేశ్‌

అనకాపల్లి పట్టణం, న్యూస్‌టుడే: అనకాపల్లి పార్లమెంట్‌ నియోజకవర్గంలోని ఏడు అసెంబ్లీ సెగ్మెంట్లలోనూ కూటమి అభ్యర్థి సీఎం రమేశ్‌ మెజార్టీ ఓట్లను సాధించారు. సార్వత్రిక ఎన్నికలకు మార్చి 16న కేంద్ర ఎన్నికల సంఘం నోటిఫికేషన్‌  ఇచ్చింది. భాజపా, తెదేపా, జనసేన కలసి పోటీచేయాలని నిర్ణయించుకున్నాయి. అనకాపల్లి పార్లమెంట్ కూటమి ఎంపీ అభ్యర్థిగా సీఎం రమేశ్‌ను ఆలస్యంగా ప్రకటించాయి. ఎన్నికలకు 50 రోజులకు మించి సమయం లేదు. మూడు పార్టీల శ్రేణులు పూర్తి సహకారాన్ని అందించడంతో తక్కువ సమయంలో ముమ్మర ప్రచారం చేశారు. పార్లమెంట్ చరిత్రలో ఏ అభ్యర్థికీ రాని 2,96,530 ఓట్ల మెజార్టీ దక్కించుకున్నారు. ఏడు నియోజకవర్గాల్లో 13,25,332 మంది ఓటు హక్కును వినియోగించుకున్నారు. వీరిలో ఈవీఎంలో ఓటు వేసిన వారు 13,06,348 మంది ఉండగా పోస్టల్‌ బ్యాలెట్లలో 18,984 మంది ఓటు హక్కును వినియోగించుకున్నారు. సీఎం రమేశ్‌కు ఈవీఎంల్లో 7,50,027 ఓట్లు, పోస్టల్‌ బ్యాలెట్లలో 12,042 దక్కాయి. వైకాపా ఎంపీ అభ్యర్థి బూడి ముత్యాలనాయుడుకు ఈవీఎం ఓట్లు 4,59,762, పోస్టల్‌ బ్యాలెట్లలో 5,777 ఓట్లు మాత్రమే వచ్చాయి.