ప్లాస్టిక్‌ రహితంగా పట్టణ రైతుబజార్‌

జూట్, గుడ్డతో తయారు చేసిన చేతి సంచుల్లో కూరగాయలు తీసుకెళ్తున్న  పట్టణవాసులు

సాధారణంగా కూరగాయలకు వెళ్తే చాలా మంది ఖాళీ చేతులతో వెళ్తుంటారు. ఆదిలాబాద్‌ రైతు బజారులో మాత్రం ఇంటి నుంచి వెళ్లేటప్పుడే చేతిలో సంచి పట్టుకొని బయలుదేరుతారు. లేకుంటే కూరగాయలు కొనలేరు మరి. ఎందుకంటే అక్కడ ప్లాస్టిక్‌ నిషేధం అమల్లో ఉంది.  రైతులంతా ఏకాభిప్రాయంగా ప్లాస్టిక్‌ వాడకాన్ని నిషేధించాలనుకున్నారు. జిల్లా కలెక్టర్‌ రాజర్షిషా ఆదేశాల మేరకు 15 రోజుల కిందట మార్కెటింగ్‌ అధికారి శ్రీనివాస్‌ ప్రత్యేక చర్యలు చేపట్టారు. దీనికి రైతులు సైతం మద్దతు పలకడంతో ప్లాస్టిక్‌ కవర్ల నిషేధం చాలా సులువైంది. ఎవరైనా పాలిథీన్‌ సంచులను వాడితే వారికి జరిమానా సైతం విధించడంతో మొదట్లో వ్యాపారం చేసుకునే రైతులు కాస్త ఇబ్బంది పడినా ఇప్పుడు అలవాటుపడ్డారు. పట్టణవాసులు సైతం పాలిథీన్‌ సంచుల కంటే జూట్తో తయారు చేసినవి పర్యావరణానికి ప్రయోజనకరం అని తెలుసుకొని వాటినే వినియోగిస్తున్నారు. రైతుబజార్‌ పరిసర ప్రాంతాల్లో పలు దుకాణాల్లో జూట్, గుడ్డతో తయారు చేసిన చేతి సంచులను విక్రయానికి ఉంచారు. ప్రస్తుతం వీటికి మంచి గిరాకీ పెరిగింది. ప్రతి 15 నిమిషాలకోసారి మైక్‌లో ఇక్కడ ప్లాస్టిక్‌ నిషేధమంటూ ప్రచారం చేస్తున్నారు.

ఈనాడు, ఆదిలాబాద్‌
 న్యూస్‌టుడే, పాలనాప్రాంగణం