పిల్లలతో వెట్టిచాకిరి చేయిస్తే క్రిమినల్‌ కేసులు

మంచిర్యాలనేరవిభాగం, న్యూస్‌టుడే: బాలకార్మిక వ్యవస్థ నిర్మూలనకు ప్రతిఒక్కరూ కృషి చేయాలని రామగుండం పోలీసు కమిషనర్‌ శ్రీనివాస్‌ సోమవారం ఒక ప్రకటనలో పేర్కొన్నారు. జులై నెలలో ఆపరేషన్‌ ముస్కాన్‌లో భాగంగా ప్రతి డివిజన్‌కు ఎస్సై స్థాయి అధికారితో పాటు నలుగురు సిబ్బందిని నియమించినట్లు ఆయన తెలిపారు. పోలీసు శాఖతో పాటు కార్మిక, విద్య, ఆరోగ్య, చిన్నారుల సంరక్షణ శాఖ అధికారులు ఓ బృందంగా ఏర్పడి తనిఖీలు చేస్తారన్నారు. ఎవరైనా చిన్నారులతో వెట్టిచాకిరి చేయిస్తున్నట్లు తేలితే వారిపై క్రిమినల్‌ కేసులు నమోదు చేస్తామని హెచ్చరించారు. బాలకార్మికులు కనిపిస్తే 1098, 100కు ఫోన్‌ చేసి సమాచారం అందించాలని కోరారు.