Adilabad: ఆర్‌ఎంపీ క్లినిక్‌లకు జరిమానా

ఎదులాపురం: అర్హతకు మించి చికిత్సలు అందిస్తున్న ఆర్ఎంపీల దవాఖానాలకు వైద్యశాఖ తనిఖీ బృందం జరిమానాలు విధించింది. స్థానిక శివాజీ కూడలిలో ఆర్‌ఎంపీ వైద్యులు సంజయ్‌ క్లినిక్‌, బాలాజీ క్లినిక్‌ ఏర్పాటు చేసి పెద్దపెద్ద బోర్డులు వేశారు. ఆ బోర్డులపై ఆర్‌ఎంపీ వైద్యులు అని కూడా రాయకుండానే ఆస్పత్రుల్లో బెడ్‌లు కూడా ఏర్పాటు చేసి చికిత్స అందిస్తున్నారు. విషయం తెలుసుకున్న వైద్యశాఖ తనిఖీ బృందం సభ్యులు పి.వెంకటరెడ్డి, రాంప్రసాద్ ఆ ఆసుపత్రులను తనిఖీ చేసి ఒక్కొక్కరికి రూ.5 వేలు చొప్పున జరిమానాలు విధించారు. అంతే కాకుండా తఖీదులు కూడా జారీ చేశారు. నిబంధనలు పాటించకపోతే సీజ్ చేస్తామన్నారు.