స్త్రీ నిధి బకాయిల వసూళ్లకు చర్యలు

దేవరుప్పుల (జనగామ జిల్లా), న్యూస్‌టుడే: గత కొంతకాలం నుంచి స్త్రీనిధి రుణాల వాయిదాలు సరిగా జమకావడం లేదు. ఎన్పీఏ (బ్యాంకు పరిభాషలో రాని బాకీలు) పెరుగుతున్నాయి. దీంతో అధికారులకు కొంత ఇబ్బందికరంగా మారింది. పొదుపు సంఘాల మహిళలకు టంచనుగా రుణాలిస్తూ వాటిని సద్వినియోగం చేసుకునేలా అవగాహన కల్పించి వెంటనే వాయిదాలను చెల్లించేలా చూడాలని అధికారులు ఎప్పటికప్పుడు చెపుతున్నారు. అప్పు తీసుకున్న వారు కట్టేందుకు దూరంగా ఉన్న బ్యాంకుకు వెళ్లి, పనిదినం వృథా చేసుకోవద్దని ఫోన్‌పే అకౌంట్‌నూ అందుబాటులోకి తెచ్చారు. ఇన్ని వసతులు కల్పించినా సొమ్ములు సరిగా జమకాకపోవడంపై అధికారులు ఆరాతీయగా, సొమ్ము దుర్వినియోగమైందని తెలిసింది. వీటి వసూళ్ల నేపథ్యంలో జిల్లా గ్రామీణాభివృద్ధి అధికారులు ఈ నెల 20న (గురువారం) బాధ్యులతో సమావేశం నిర్వహిస్తున్నారు. వీటి ఆధారంగా పలు సందర్భాల్లో బకాయిలు చెల్లించాలని గట్టిగా హెచ్చరించినా దుర్వినియోగం చేసిన బాధ్యులు అంతగా స్పందించలేదని సమాచారం. రాని బాకీలతో సంఘాలకు రుణాలు ఇవ్వడానికి బ్యాంకులు ఆసక్తి చూపరు. దీంతో టంచనుగా వాయిదాలు చెల్లించిన వారికి అప్పు పుట్టని పరిస్థితి నెలకొందని ఒక అధికారి చెప్పారు. గురువారం దీనిపై స్పష్టత రానుందని సమాచారం.