ప్రపంచ స్కేటింగ్‌లో మెరిసిన తెలుగుతేజం

పసిడి పతకంతో జెస్సీరాజ్‌

విజయవాడ క్రీడలు, మంగళగిరి, న్యూస్‌టుడే : ప్రపంచ స్కేటింగ్‌ పోటీల్లో తెలుగు తేజం మాత్రపు జెస్సీరాజ్‌(13) సత్తా చాటి పసిడి పతకంతో మెరిసింది. న్యూజిలాండ్‌లోని న్యూ ప్లేమౌత్‌లో ఈ నెల 13వ తేదీ నుంచి జరుగుతున్న పసిఫిక్‌ కప్‌ ఆర్టిస్టిక్‌ ఓపెన్‌ ఇన్విటేషన్‌ పోటీల్లో జెస్సీరాజ్‌ భారత్‌ జట్టుకు ప్రాతినిథ్యం వహించింది. ఆదివారం జరిగిన పోటీల్లో జెస్సీరాజ్‌ ఇన్‌లైన్‌ ఫ్రీ స్టైల్‌ ఈవెంట్‌లో అండర్‌-14 బాలికల విభాగంలో తలపడి పసిడి పతకం కైవసం చేసుకుందని రాష్ట్ర రోలర్‌ స్కేటింగ్‌ సంఘం కార్యదర్శి థామస్‌ చౌదరి తెలిపారు. ఈ ఈవెంట్‌లో భారత్‌తో పాటు ఆస్ట్రేలియా, బ్రెజిల్, చైనా, ఐర్లాండ్, జపాన్, న్యూజిలాండ్‌ దేశాలకు చెందిన 17 మంది క్రీడాకారిణులు తలపడగా.. జెస్సీరాజ్‌ అత్యధికంగా 31.98 పాయింట్లు స్కోర్‌ చేసి అగ్ర స్థానంలో నిలిచిందని పేర్కొన్నారు.