Crime News: ఆస్తి తగాదాలు.. తల్లీబిడ్డలను గదిలో బంధించి గోడ కట్టేశారు!

ఇస్లామాబాద్‌: పాకిస్థాన్‌లోని హైదరాబాద్‌ నగరంలో అమానవీయ ఘటన చోటుచేసుకుంది. పరాకాష్ఠకు చేరిన ఆస్తి పంపకాల గొడవలు.. తల్లీబిడ్డలను గదిలో బంధించి గోడ కట్టే వరకు వెళ్లాయి. పోలీసుల వివరాల ప్రకారం.. నగరంలోని లతిఫాబాద్‌ ప్రాంతంలో ఈ ఘటన వెలుగులోకి వచ్చింది.

సమాచారం అందిన వెంటనే ఘటనా స్థలానికి చేరుకున్న పోలీసులు గోడను బద్దలుకొట్టి బాధితులను రక్షించారు. బాధితురాలు తెలిపిన వివరాల ప్రకారం.. వరుసకు బావ అయిన సుహైల్‌ కుమారులతో కలిసి గతకొంతకాలంగా తీవ్రంగా వేధిస్తున్నారు. ఆస్తి తగాదాల్లో భాగంగానే ఈ దుశ్చర్యలకు పాల్పడుతున్నారు. ఇటీవల అవి మరింత ముదరటంతో తనతో పాటు తన కుమార్తెను ఓ గదిలో బంధించి బయట నుంచి గోడ కట్టారని వాపోయింది.

స్థానికుల ద్వారా సమాచారం అందుకున్న పోలీసులు వెంటనే అక్కడకు వెళ్లి వారిని రక్షించారు. సుహైల్‌, ఆయన కుమారులపై కేసు నమోదు చేశారు. ఈ దుశ్చర్యకు కారణమైన వారిపై కఠిన సెక్షన్ల కేసు నమోదు చేసి, తగిన శిక్ష పడేలా చేస్తామని స్థానిక పోలీస్ అధికారి ఫరూక్‌ లింజర్‌ తెలిపారు. దీన్ని ఘోరమైన చర్యగా అభివర్ణించిన ఆయన.. మున్ముందు ఈ ఘటనలు జరగకుండా చూస్తామని ప్రజలకు హామీ ఇచ్చారు.