కొత్త చట్టంతో చార్మినార్‌లో తొలి కేసు

నంబరు ప్లేటు లేని వాహదారులపై డిజిటల్‌ కేసు

ఈనాడు, హైదరాబాద్‌: దేశంలో అమల్లోకి వచ్చిన కొత్త చట్టంతో రాష్ట్రంలో తొలిసారిగా చార్మినార్‌ పోలీస్‌స్టేషన్‌లో కేసు నమోదైంది. భారతీయ న్యాయ సంహిత(బీఎన్‌ఎస్‌), భారతీయ నాగరిక్‌ సురక్షా సంహిత(బీఎన్‌ఎస్‌ఎస్‌), భారతీయ సాక్ష్య అధినియమ్‌(బీఎస్‌ఏ) చట్టాలు జులై 1 నుంచి అమల్లోకి వచ్చారు. ఆదివారం చార్మినార్‌ ఠాణా పరిధిలోని గుల్జార్‌ హౌస్‌ క్రాస్‌రోడ్‌ వద్ద అర్ధరాత్రి దాటాక 1 గంట సమయంలో నంబరు ప్లేటు లేకుండా, నిర్లక్ష్యంగా ద్విచక్ర వాహనాలు నడుపుతున్న ఇద్దరిని గుర్తించారు. వీరిని బోరబండకు చెందిన సోహెల్‌ అన్సారీ(19), ఘాన్సీబజార్‌కు చెందిన షేక్‌ సత్వర్‌(26)లుగా గుర్తించారు. సుమోటోగా 281 బీఎన్‌ఎస్, సెక్షన్‌ 80(ఏ), 177 ఎంవీ యాక్ట్‌ ప్రకారం కేసు నమోదు చేసినట్టు ఇన్‌స్పెక్టర్‌ చంద్రశేఖర్‌ సోమవారం తెలిపారు. కొత్తచట్టాల అమల్లో భాగంగా చార్మినార్‌ పోలీసులు నమోదుచేసిన కేసుపై రాష్ట్ర డీజీపీ రవిగుప్తా ఎక్స్‌ ద్వారా అభినందనలు తెలిపారు.