అనుమానంతో హతమార్చాడు

కారుతో ఢీకొట్టి మహిళ దారుణ హత్య

హబ్సిగూడ, న్యూస్‌టుడే: తనతో సన్నిహితంగా ఉంటున్న మహిళపై అనుమానం పెంచుకుని.. ఆమెను కారుతో ఢీకొట్టి హత్య చేసిన అమానవీయ ఘటన ఇది. ఉప్పల్‌ పోలీసుల కథనం ప్రకారం.. హైదరాబాద్‌లోని రామంతపూర్‌ డివిజన్‌ వివేక్‌నగర్‌లో నివాసం ఉంటున్న మహిళ(47), అదే డివిజన్‌లోని శ్రీనగర్‌ కాలనీలో ఉంటున్న చంద్రమౌళి(47) స్థిరాస్తి వ్యాపారులు. ఇద్దరూ కలిసి నాగోల్‌లో రియల్‌ ఎస్టేట్‌ కార్యాలయం ఏర్పాటు చేశారు. వీరిద్దరి మధ్య వివాహేతర సంబంధం కొనసాగుతోంది. ఆమె కొన్ని నెలలుగా మరొక వ్యక్తితో సన్నిహితంగా ఉంటోందని చంద్రమౌళికి అనుమానం వచ్చింది. దీంతో కక్ష పెంచుకున్నాడు. మాట్లాడుకుందామంటూ ఆమెను ఆదివారం అర్ధరాత్రి ఉప్పల్‌ భగాయత్‌కు తీసుకొచ్చాడు. అనంతరం ఇళ్లకు తిరిగివెళ్తున్న క్రమంలో రోడ్డు పక్కన నిల్చున్న ఆమెను కారుతో ఢీకొట్టాడు. దీంతో ఆమె అక్కడికక్కడే ప్రాణాలు కోల్పోయింది. అనంతరం చంద్రమౌళి ఉప్పల్‌ పోలీస్‌ స్టేషన్‌కి వెళ్లి లొంగిపోయాడు.