మహిళల దుస్తులు ధరించి విమానాశ్రయ అధికారి ఆత్మహత్య

రుద్రపుర్‌: మహిళల దుస్తులు ధరించిన విమానాశ్రయ అధికారి ఒకరు తన గదిలో ఉరి వేసుకుని ఆత్మహత్య చేసుకున్నారు. ఉత్తరాఖండ్‌ రాష్ట్రం ఉధమ్‌సింగ్‌నగర్‌ జిల్లా పంత్‌నగర్‌లోని విమానాశ్రయంలో ఈ ఘటన చోటు చేసుకుంది. పితోర్‌గఢ్‌ జిల్లాకు చెందిన ఆశిష్‌ చౌసాలి విమానాశ్రయంలో అసిస్టెంట్‌ మేనేజర్‌గా పని చేస్తున్నారు. సోమవారం ఆయన మహిళల దుస్తులు ధరించి, నుదుటన బొట్టు బిళ్ల పెట్టుకుని, లిప్‌స్టిక్‌ వేసుకుని తన గదిలో ఉరి వేసుకుని ఆత్మహత్య చేసుకున్నారు. ఉధమ్‌సింగ్‌నగర్‌ జిల్లా (నగర) ఎస్పీ మనోజ్‌ కత్యాల్‌ మంగళవారం ఈ విషయాన్ని తెలిపారు. ఈ ఘటనను ప్రాథమికంగా ఆత్మహత్యగా భావిస్తున్నామని, గదిలో ఎలాంటి ఆధారాలు దొరకలేదని వెల్లడించారు.