ఏసీబీకి పట్టుబడిన వెల్దండ ఎస్సై

వెల్దండ గ్రామీణం, న్యూస్‌టుడే: నాగర్‌కర్నూల్‌ జిల్లా వెల్దండ ఎస్సై రవి అవినీతి నిరోధక శాఖ (ఏసీబీ)కు పట్టుబట్టారు. ఏసీబీ డీఎస్పీ కృష్ణాగౌడ్‌ కథనం ప్రకారం.. కల్వకుర్తి పట్టణంలోని తిలక్‌నగర్‌ చెందిన డేరంగుల వెంకటేశ్‌ ఇంట్లో ఈనెల 17న రాళ్లు పగులగొట్టేందుకు వినియోగించే మందుగుండు సామగ్రి 7 పెట్టెల జిలిటెన్‌ స్టిక్స్, 2 పెట్టెల డిటోనేటర్లను నిల్వ చేయగా వెల్దండ పోలీసులు పట్టుకున్నారు. ఈ విషయంలో కేసు నమోదు చేయకుండా ఉండాలంటే రూ.50 వేలు లంచం ఇవ్వాలని ఎస్సై డిమాండ్‌ చేశారు. బాధితుడు వెంకటేశ్‌ ఈ నెల 19న ఏసీబీని ఆశ్రయించారు. ఎస్సై సూచన మేరకు వెంకటేశ్‌ కల్వకుర్తి పట్టణానికి చెందిన అంబులెన్సు డ్రైవర్‌ విక్రమ్‌కు రూ.50వేలు ఇస్తుండగా ఏసీబీ అధికారులు పట్టుకున్నారు. అదే సమయంలో వెల్దండ ఠాణాలో ఎస్సై రవిని అరెస్టు చేశామని అనిశా డీఎస్పీ తెలిపారు.