KYC update: బ్యాంకులు రీ కేవైసీ అడుగుతున్నాయా? ఆన్‌లైన్‌లో సులువుగా చేసుకోండిలా..

KYC update | ఇంటర్నెట్‌డెస్క్‌: బ్యాంకులో ఖాతా ఉన్నా.. మ్యూచువల్‌ ఫండ్‌లో మదుపు చేస్తున్నా.. ఇతర ఆర్థిక కార్యకలాపాలు సజావుగా జరగాలన్నా కేవైసీ (మీ ఖాతాదారు గురించి తెలుసుకోండి) వివరాలు తెలియజేయడం తప్పనిసరి. కస్టమర్ల ఖాతాకు భద్రతను పెంచడంతో పాటు, మోసాలను నివారించడంలో భాగంగా బ్యాంకులు కేవైసీ వివరాలను ఎప్పటికప్పుడు అప్‌డేట్‌ చేయాలని కోరుతుంటాయి. ఈ ప్రక్రియను ఎలా పూర్తి చేయాలో తెలియక చాలా మంది ఇబ్బంది పడుతుంటారు. ప్రస్తుతం అనేక బ్యాంకులు తమ కస్టమర్లకు కేవైసీ వివరాలు ఆన్‌లైన్‌లోనే అప్‌డేట్‌ చేసుకునే సదుపాయాన్ని అందిస్తున్నాయి. బ్యాంక్‌ పోర్టల్‌లోకి వెళ్లి సులువుగా కేవైసీని అప్‌డేట్‌ చేసుకోవచ్చు. బ్యాంకును బట్టి ఈ ప్రక్రియలో చిన్న చిన్న మార్పులుంటాయి. ప్రధాన బ్యాంకుల్లో ఈ ప్రక్రియ ఎలా ఉంటుందో ఇక్కడ చూద్దాం..

స్టేట్‌ బ్యాంక్‌ ఆఫ్‌ ఇండియా: ఎస్‌బీఐ ఆన్‌లైన్‌ బ్యాంకింగ్‌లో పోర్టల్‌లోకి లాగిన్ అయ్యి ‘My Accounts & Profile’ సెక్షన్‌ కింద కనిపించే ‘Update KYC’పై క్లిక్‌ చేయాలి. ఎస్‌బీఐ అకౌంట్‌ను ఎంచుకొని ‘Next’పై క్లిక్‌ చేసి మీరు సంబంధిత పత్రాలను అప్‌లోడ్‌ చేయాలి.

హెచ్‌డీఎఫ్‌సీ: హెచ్‌డీఎఫ్‌సీలో రీ- కేవైసీని వెబ్‌సైట్‌లోనే సులువుగా చేసుకోవచ్చు. పోర్టల్‌లోని వ్యక్తిగత విభాగంలో దీనికి సంబంధించిన లింక్‌ ఉంటుంది. లేదంటే బ్యాంక్‌ నుంచి సంబంధిత ఫారాన్ని డౌన్‌లోడ్‌ చేసుకుని వివరాలు నింపి, పత్రాలు జోడించి దగ్గర్లోని బ్యాంకు శాఖకు పంపించాలి. లేదంటే నేరుగా బ్యాంకు శాఖలో అందించొచ్చు.

వివో కొత్త ఫోల్డబుల్‌ ఫోన్‌.. ధర రూ.లక్షన్నర పైనే!

ఐసీఐసీఐ: ఐసీఐసీఐ నెట్‌ బ్యాంకింగ్‌ పోర్టల్‌లో లాగిన్‌ అవ్వాలి. ఒకవేళ మీ కేవైసీ అప్‌డేట్‌ చేయాల్సిఉంటే స్క్రీన్‌పైనే చూపిస్తుంది. అక్కడే కనిపించే ఆథరైజేషన్‌ బాక్స్‌పై టిక్‌ చేసి ‘Update Through Document Upload’ ఆప్షన్‌ను ఎంచుకోండి. వివరాల్లో ఏవైనా మార్పులు ఉంటే వాటిని అప్‌డేట్‌ చేసి పాన్‌ కార్డ్‌ను అప్‌లోడ్‌ చేయాలి. చిరునామా వివరాలను కూడా అక్కడే మార్చుకోవచ్చు. 

కెనరా బ్యాంక్‌: లాగిన్‌ వివరాలతో కెనరా బ్యాంక్‌ వెబ్‌సైట్లో లాగిన్‌ అవగానే ‘services’ కింద కనిపించే ‘Re-KYC’పై క్లిక్‌ చేసి వివరాలు అప్‌డేట్‌ చేసేయొచ్చు.

యెస్‌ బ్యాంక్‌ అయితే.. బ్యాంక్‌ పోర్టల్‌లో లాగిన్‌ అవ్వగానే రీ- కేవైసీని పాప్-అప్ ఉంటుంది. ఆధార్‌ అథెంటికేషన్‌లో కేవైసీ పూర్తి చేయొచ్చు. చిరునామాల్లో ఏవైనా మార్పులున్నా చేసుకోవచ్చు. పాస్‌పోర్ట్‌, పాన్‌ కార్డ్‌, భారత ప్రభుత్వం జారీ చేసిన ఈ- ఆధార్‌ లెటర్‌, డ్రైవింగ్‌ లైసెన్స్‌, ఓటర్‌ ఐడీ, NREGA జారీ చేసిన జాబ్‌కార్డ్‌ లను చిరునామా, ఐడీ ప్రూఫ్‌గా అంగీకరిస్తారు.