Office space leasing: హైదరాబాద్‌లో 40% పెరిగిన కార్యాలయాల అద్దె లావాదేవీలు

కుష్‌మన్‌ అండ్‌ వేక్‌ఫీల్డ్‌ నివేదిక

ఈనాడు, హైదరాబాద్‌: అంతర్జాతీయ సంస్థలతో పాటు, దేశీయ కంపెనీలూ కార్యాలయాలు ఏర్పాటు చేసేందుకు ఆసక్తి చూపడంతో, హైదరాబాద్‌లో కార్యాలయాల స్థలానికి గిరాకీ పెరిగింది. ఈ ఏడాది ప్రథమార్ధంలో మొత్తం 50 లక్షల చదరపు అడుగుల స్థలం అద్దెకు వెళ్లింది. గత ఏడాది ఇదే కాలంలో 36 లక్షల చదరపు అడుగుల స్థలాన్ని సంస్థలు అద్దెకు తీసుకున్నాయి. దీంతో పోలిస్తే ఈసారి అద్దె లావాదేవీల్లో 40% వృద్ధి కనిపించిందని స్థిరాస్తి సేవల సంస్థ కుష్‌మన్‌ అండ్‌ వేక్‌ఫీల్డ్‌ నివేదిక వెల్లడించింది. ప్రముఖ సంస్థలు తమ వ్యాపార విస్తరణకు హైదరాబాద్‌ను కీలక స్థానంగా భావిస్తున్నాయని పేర్కొంది.

అందుబాటులో ఉండటమే..: హైదరాబాద్‌లో కార్యాలయ స్థలానికి గిరాకీ పెరిగేందుకు ఇక్కడి మౌలిక వసతులతో పాటు, అనువైన వ్యాపార విధానాలు, స్థిరమైన ప్రభుత్వం లాంటివి తోడ్పడుతున్నాయని నివేదిక పేర్కొంది. ఇక్కడ స్థిరాస్తి ధరలు అందుబాటులో ఉండటం, నిపుణుల లభ్యతా అనుకూలంగా ఉందని తెలిపింది. దీంతో హైదరాబాద్‌పై పెట్టుబడిదారులు, స్థిరాస్తి డెవలపర్లు, సంస్థలూ సానుకూలంగా ఉంటున్నట్లు వెల్లడించింది.

గ్రేడ్‌ ఏ ప్రాజెక్టులకు..: భవిష్యత్‌ విస్తరణ ప్రణాళికలకు వీలుగా ఉండేలా చూసుకోవడంతో పాటు, ఆధునిక వసతులు, కీలక ప్రాంతాల్లో ఉన్న గ్రేడ్‌ ఏ వాణిజ్య ప్రాజెక్టులకు అధిక గిరాకీ ఉందని నివేదిక పేర్కొంది. ఏప్రిల్‌-జూన్‌ మధ్య కాలంలో కొత్తగా 27 లక్షల చదరపు అడుగుల స్థలం అందుబాటులోకి వచ్చిందని పేర్కొంది.

ఐటీ రంగంలోనే..: అత్యధిక లీజింగ్‌ లావాదేవీలు ఐటీ-బీపీఎం రంగంలోనే జరిగాయి. మొత్తం అద్దెకు వెళ్లిన స్థలంలో 36% వరకు ఈ సంస్థలే తీసుకున్నాయి. బ్యాంకింగ్, ఆర్థిక సేవల సంస్థలు 29% స్థలాన్ని అద్దెకు తీసుకున్నాయి. ఫ్లెక్సిబుల్‌ వర్క్‌ప్లేస్‌ సంస్థలు 17% స్థలాన్ని తీసుకున్నాయి. వీటితో పాటు కో-లివింగ్‌ లాంటి వాటి కోసమూ అద్దె లావాదేవీలు జరిగాయి.