Anant Ambani Wedding: అనంత్‌ అంబానీ - రాధికా మర్చెంట్‌ ‘మామెరు’ ఫంక్షన్‌.. ఏంటీ వేడుక?

ముంబయి: రిలయన్స్‌ ఇండస్ట్రీస్‌ అధినేత ముకేశ్ అంబానీ (Mukesh Ambani) ఇంట పెళ్లి సందడి అంబరాన్నంటుతోంది. మరికొన్ని రోజుల్లో ఆయన చిన్న కుమారుడు అనంత్‌ అంబానీ (Anant Ambani) - రాధికా మర్చెంట్‌ వివాహం జరగనుంది. ఈ జంట నిశ్చితార్థం మొదలు.. ప్రతి వేడుకా అందరినీ ఆకట్టుకుంటోంది. తాజాగా బుధవారం రాత్రి వీరికి ‘మామెరు’ వేడుక నిర్వహించారు. ఈ సెలబ్రేషన్స్‌కు బాలీవుడ్‌ నటీనటులు హాజరై సందడి చేశారు. ఇందుకు సంబంధించిన ఫొటోలు ప్రస్తుతం సోషల్‌ మీడియాలో వైరల్‌ అవుతున్నాయి. దీంతో ఈ వేడుక ఏంటా అని నెటిజన్లు తెగ సెర్చ్‌ చేస్తున్నారు.

‘మామెరు’ ముచ్చట ఇదీ..

మామెరు (Mameru ceremony) అనేది గుజరాతీ సంప్రదాయ వేడుక. దీని ప్రకారం.. వివాహానికి ముందు వరుడు తల్లి పుట్టింటివాళ్లు/మేనమామలు సంప్రదాయబద్ధంగా కాబోయే వధూవరులకు కానుకలు తీసుకొచ్చి ఆశీర్వదిస్తారు. అనంత్‌-రాధిక జంటకు నిన్న ఈ వేడుక నిర్వహించారు. ఇందులో నీతా (Nita Ambani) తల్లి పూర్ణిమ దలాల్‌, ఆమె సోదరి మమత తదితరులు అంబానీ ఇంటికి వచ్చి కాబోయే దంపతులకు బహుమతులు ఇచ్చి ఆశీర్వదించారు. ఈ వేడుకను అంబానీ కుటుంబం ఎంతో ప్రత్యేకంగా చేసింది.

అమ్మ ఆభరణాల్లో మెరిసిన రాధిక..

ఈ వేడుకలో పెళ్లికూతురు రాధిక మర్చెంట్‌ (Radhika Merchant).. ప్రముఖ డిజైనర్‌ మనీశ్ మల్హోత్రా రూపొందించిన రాణీ పింక్‌ లెహంగాలో మెరిసిపోయారు. ఈ లెహంగా బోర్డర్‌పై దుర్గాదేవి శ్లోకాలను బంగారు తీగలతో ప్రత్యేకంగా ఎంబ్రాయిడరీ చేశారు. ఈ ఫంక్షన్‌లో రాధిక తన తల్లి నగలను వేసుకున్నారు. ఇక, ఈ వేడుకలో ముకేశ్‌ అంబానీ మనవలు, మనవరాళ్లు ప్రత్యేక ఆకర్షణగా నిలిచారు. డ్యాన్స్‌లు చేస్తూ సందడి చేశారు. బాలీవుడ్‌ తారలు జాన్వీ కపూర్‌, మానుషి చిల్లర్‌ తదితరులు హాజరయ్యారు.

సోనియా గాంధీకి ఆహ్వానం..

అనంత్-రాధిక వివాహానికి ఇప్పటికే అంబానీ కుటుంబం ఆహ్వానాలను మొదలుపెట్టింది. తొలి పత్రికను నీతా అంబానీ (Nita Ambani) వారణాసిలోని కాశీ విశ్వనాథుని పాదాల వద్ద ఉంచి ఆశీస్సులు తీసుకున్నారు. ఆ తర్వాత ముంబయిలోని పలువురు రాజకీయ, సినీ ప్రముఖులను ముకేశ్‌ అంబానీ (Mukesh Ambani) స్వయంగా వెళ్లి ఆహ్వానించారు. తాజాగా గురువారం కాంగ్రెస్‌ అగ్రనాయకురాలు సోనియా గాంధీ నివాసం 10 జన్‌పథ్‌కు వెళ్లారు. సోనియా కుటుంబాన్ని ఈ వివాహ వేడుకకు ఆహ్వానించారు.

జులై 12న అనంత్‌-రాధికా మర్చెంట్‌ పెళ్లి వేడుక (Anant Ambani-Radhika Merchant wedding) జరగనుంది. ముంబయిలోని బాంద్రా కుర్లా కాంప్లెక్స్‌లోని జియో వరల్డ్‌ కన్వెన్షన్‌ సెంటర్‌ ఇందుకు వేదిక కానుంది. మూడు రోజుల పాటు వివాహ వేడుకలు జరగనున్నాయి. జులై 12న ముఖ్య ఘట్టమైన ‘శుభ్‌ వివాహ్‌’తో మొదలయ్యే ఈ సెలబ్రేషన్స్‌.. జులై 13న ‘శుభ్‌ ఆశీర్వాద్‌’, జులై 14న ‘మంగళ్‌ ఉత్సవ్‌’తో ముగుస్తాయి.