సంక్షిప్త వార్తలు

మోసగాళ్ల వివరాలివ్వండి

సెబీ ఛైర్మన్‌ మాధబి పురి బచ్‌ 

ముంబయి: స్టాక్‌ మార్కెట్లో మోసాలు చేసే వారి గురించి తమకు తెలియజేయాలని మార్కెట్‌ వర్గాలకు సెబీ ఛైర్మన్‌ మాధబి పురి బచ్‌ పిలుపునిచ్చారు. ఇది కూడా మదుపర్ల ప్రయోజనాలను రక్షించడమే అవుతుందని అన్నారు. వ్యవస్థా పరమైన సమస్యగా మారే ముందే, సెబీ కఠిన నిబంధనలు తీసుకు రాకముందే అటువంటి తప్పుడు అంశాలను తమ దృష్టికి తీసుకురావాలని పోర్ట్‌ఫోలియో మేనేజర్లకు సూచించారు. ‘మంచి వారే గెలవాలి. ఏదైనా తప్పు జరుగుతుంటే మీరు మాకు చెప్పండి. ఒక్క సారి ఏదైనా భారీ తప్పిదం జరిగితే, మార్కెట్లపై మదుపర్లకు విశ్వాసం పోతుంది. అదే జరిగితే వారి విశ్వాసాన్ని తిరిగి పొందడానికి చాలా సమయం పడుతుంది. తప్పుచేసే వారిపై బలమైన, కఠిన చర్యలను మేము తీసుకోవాల్సి వస్తుంది. ఈ రెండూ జరగకుండా, వ్యవస్థ పేకమేడలా కుప్పకూలకుండా ఉండాలంటే ముందుగానే మాకు, అటువంటి వారి గురించి సమాచారం ఇవ్వండి’ అని ఆమె పోర్ట్‌ఫోలియో మేనేజర్లకు సూచించారు. 

మెటా థ్రెడ్స్‌కు భారత్‌లో ఆదరణ

దిల్లీ: థ్రెడ్స్‌కు అత్యధిక వినియోగదారులు ఉన్న దేశాల్లో భారత్‌ ఒకటని, అంతర్జాతీయంగా ఈ యాప్‌కు 1.75 కోట్ల మంది నెలవారీ క్రియాశీల వినియోగదారులు ఉన్నట్లు సామాజిక మాధ్యమ దిగ్గజం మెటా వెల్లడించింది. ఎక్స్‌ (ట్విటర్‌)కు పోటీ ఏడాదిక్రితం థ్రెడ్స్‌ను మెటా తీసుకొచ్చిన విషయం తెలిసిందే.