ద్రవ్యలోటు 4 శాతమైతే రెండేళ్లలో రేటింగ్‌ పెంపు!

ఎస్‌అండ్‌పీ 

దిల్లీ: అప్పుల నిర్వహణ సరిగ్గా ఉండి, ద్రవ్యలోటును జీడీపీలో 4 శాతానికి తీసుకొస్తే, వచ్చే 24 నెలల్లో భారత రేటింగ్‌ పెంపునకు అవకాశాలు ఉంటాయని ఎస్‌అండ్‌పీ గ్లోబల్‌ రేటింగ్స్‌ డైరెక్టరు ఈఫార్న్‌ ఫ్యూహా వెల్లడించారు. ‘దేశ సార్వభౌమ రేటింగ్‌ను పెంచాలంటే ప్రభుత్వ ద్రవ్యలోటు (కేంద్రం, రాష్ట్రాలది కలిపి) జీడీపీలో 7 శాతం దిగువన ఉండాలి. ఇందులో చాలా వరకు కేంద్ర ప్రభుత్వం చేతిలోనే ఉంద’ని తెలిపారు. ప్రభుత్వ ఆదాయాలు, వ్యయాల వ్యత్యాసాన్ని ద్రవ్యలోటుగా చెబుతారు. ప్రస్తుత ఆర్థిక సంవత్సరంలో ద్రవ్యలోటును జీడీపీలో 5.1 శాతానికి పరిమితం చేయగలమన్నది కేంద్ర ప్రభుత్వ అంచనా. 2023-24లో ద్రవ్యలోటు 5.63 శాతంగా ఉంది. 2025-26 కల్లా జీడీపీలో 4.5 శాతానికి పరిమితం చేయాలని ప్రభుత్వం లక్ష్యంగా పెట్టుకుంది. భారత రేటింగ్‌ను ‘బీబీబీ-’ వద్దే కొనసాగిస్తూ, భవిష్యత్‌ అంచనాను స్థిరత్వం నుంచి సానుకూలానికి ఈ ఏడాది మేలో ఎస్‌అండ్‌పీ సవరించిన సంగతి తెలిసిందే.

దేశీయంగా వినియోగం పెరగడం, మౌలిక సదుపాయాలపై పెట్టుబడుల వల్ల గత మూడేళ్లలో దేశ ఆర్థిక వ్యవస్థ సగటున 8% వృద్ధిని నమోదు చేసిందని ఫ్యూహా వెల్లడించారు. మధ్యకాలానికి 7% వృద్ధిని నమోదు చేసే సామర్థ్యం భారత్‌కు ఉందని తెలిపారు. ఒకవేళ మౌలిక రంగానికి అవరోధాలు తొలిగితే, వృద్ధిరేటు 8 శాతానికీ పెరగొచ్చని అంచనా వేశారు. ప్రస్తుత ఆర్థిక సంవత్సరంలో వృద్ధి రేటు 6.8 శాతంగా ఉండొచ్చని ఎస్‌అండ్‌పీ అంచనా వేసింది. గత ఆర్థిక సంవత్సరంలో 8.2% కావడం గమనార్హం. ఆసియా ప్రాంతంలో అత్యంత వేగంగా వృద్ధి చెందుతున్నది భారతేనని ఎస్‌అండ్‌పీ గ్లోబల్‌ రేటింగ్స్‌ ముఖ్య ఆర్థికవేత్త (ఆసియా- పసిఫిక్‌) లూయిస్‌ కుయిజ్స్‌ తెలిపారు.