ఆర్‌బీఐకి ఇద్దరు కొత్త ఎగ్జిక్యూటివ్‌ డైరెక్టర్లు

ముంబయి: రిజర్వ్‌ బ్యాంక్‌ ఆఫ్‌ ఇండియా (ఆర్‌బీఐ) కొత్త ఎగ్జిక్యూటివ్‌ డైరెక్టర్‌లుగా అర్నబ్‌ కుమార్‌ ఛౌధ్రీ, చారులతా ఎస్‌ కర్‌ నియమితులయ్యారు. ఇప్పటివరకు వీరు ఆర్‌బీఐలో చీఫ్‌ జనరల్‌ మేనేజర్లుగా ఉన్నారు. వీరిద్దరు చెరో మూడు విభాగాలను పర్యవేక్షించనున్నారు. కర్‌ నియామకం జులై 1 నుంచి, ఛౌధ్రీ నియామకం జులై 3 నుంచి అమల్లోకి వస్తున్నాయి. డీఐసీజీసీ, విదేశీ మారకపు విభాగం, అంతర్జాతీయ విభాగాలను ఛౌధ్రీ చూస్తారు. కమ్యూనికేషన్, మానవ వనరులు, సమాచార హక్కు విభాగాలను కర్‌ నడిపించనున్నారు. 

• ఓఎన్‌జీసీ నుంచి గణనీయ ఆర్డరు దక్కించుకున్నట్లు ఎల్‌ అండ్‌ టీ తెలిపింది. కంపెనీ రూ.1000- 2500 కోట్ల శ్రేణిలో వాటిని గణనీయ ఆర్డర్లుగా పరిగణిస్తుంది.
• కేరళకు చెందిన బేబీ మెమోరియల్‌ హాస్పిటల్‌ (బీఎంహెచ్‌)లో నియంత్రిత వాటాను కొనుగోలు చేసినట్లు అంతర్జాతీయ ప్రైవేట్‌ ఈక్విటీ దిగ్గజం కేకేఆర్‌ ప్రకటించింది. హాస్పిటల్‌లో 70% వాటాను దాదాపు రూ.2000 కోట్లకు కొనుగోలు చేస్తున్నట్లు సంబంధిత వర్గాలు తెలిపాయి. క్యాలికట్, కన్నూర్‌లలో మొత్తం 1000 పడకల సూపర్‌ స్పెషాలిటీ ఆసుపత్రులను బీఎంహెచ్‌ నిర్వహిస్తోంది.