ఎయిరిండియా పైలట్ల శిక్షణ సంస్థ

ముంబయి: టాటా గ్రూప్‌ యాజమాన్యంలోని ఎయిరిండియా, మహారాష్ట్రలోని అమరావతిలో పైలట్ల శిక్షణ సంస్థను ఏర్పాటు చేస్తోంది. ఇక్కడ ఏడాదికి 180 మంది వాణిజ్య పైలట్లకు శిక్షణ ఇవ్వాలన్నది ప్రతిపాదన. పౌర విమానయాన డైరెక్టరేట్‌ జనరల్‌ (డీజీసీఏ) లైసెన్స్‌తో, ఫ్లైట్‌ ట్రైనింగ్‌ ఆర్గనైజేషన్‌ (ఎఫ్‌టీఓ)ను బెలోరా ఎయిర్‌పోర్ట్‌ వద్ద ఎయిరిండియా ఏర్పాటు చేస్తోంది. ఇది దక్షిణాసియాలోనే అతి పెద్దది. వచ్చే ఆర్థిక సంవత్సరం తొలి త్రైమాసికం (ఏప్రిల్‌-జూన్‌)లో ఇక్కడ కార్యకలాపాలు ప్రారంభమవుతాయని ఎయిరిండియా తెలిపింది. ఇక్కడ శిక్షణ కోసం 31 సింగిల్‌-ఇంజిన్‌ విమానాలు, 3 ట్విన్‌-ఇంజిన్‌ విమానాలు అందుబాటులో ఉంటాయని పేర్కొంది. పది ఎకరాల ప్రాంగణంలో ఈ కేంద్రాన్ని తీర్చిదిద్దారు.