లిక్విడేషన్‌ ప్రక్రియ పర్యవేక్షణకు ఎలక్ట్రానిక్‌ ఫామ్‌లు: ఐబీబీఐ

దిల్లీ: దివాలా పరిష్కార వృత్తి నిపుణులకు నిబంధనల భారం సులభతరం చేసేందుకు, లిక్విడేషన్‌ ప్రక్రియను ప్రభావవంతంగా పూర్తి చేసేందుకు వీలుగా దివాలా స్మృతి (ఐబీసీ) కింద ఎలక్ట్రానిక్‌ ఫామ్‌లను ఇన్‌సాల్వెన్సీ అండ్‌ బ్యాంక్రప్టసీ బోర్డ్‌ ఆఫ్‌ ఇండియా (ఐబీబీఐ) తీసుకొచ్చింది. లిక్విడేషన్‌ ప్రక్రియలో ఈ ఫామ్‌లు ఎంతో కీలకంగా వ్యవహరిస్తాయని, రికార్డులను పద్ధతిగా, పారదర్శకంగా నిర్వహించేందుకు, ఆటంకాలు లేని రిపోర్టింగ్‌కు ఇవి దోహదం చేస్తాయని ఐబీబీఐ వెల్లడించింది. జూన్‌ 28న తీసుకొచ్చిన కొత్త సర్క్యులర్‌లో ఎల్‌ఐక్యూ 1 నుంచి ఎల్‌ఐక్యూ 4 వరకు ఫామ్‌లను పరిచయం చేస్తున్నట్లు ఐబీబీఐ తెలిపింది. లిక్విడేషన్‌ ప్రక్రియలో వివిధ దశల్లో ఆయా ఎలక్ట్రానిక్‌ ఫామ్‌లను వినియోగించాల్సి ఉంటుంది. ప్రస్తుతం దివాలా పరిష్కార వృత్తి నిపుణులు (ఐపీలు) లిక్విడేషన్‌ ప్రక్రియకు సంబంధించిన వివరాలను ఇ-మెయిళ్ల ద్వారా బోర్డుకు తెలియజేస్తున్నారు. దీంతో సమయం వృథా అవుతోంది.