రూ.12,000 కోట్ల సమీకరణలో ఎన్‌టీపీసీ

దిల్లీ: ప్రభుత్వ రంగ విద్యుదుత్పత్తి సంస్థ ఎన్‌టీపీసీ.. మార్పిడి రహిత డిబెంచర్ల (ఎన్‌సీడీ) జారీ ద్వారా రూ.12,000 కోట్లను సమీకరించనుంది. ఇందుకు శనివారం ఆ సంస్థ డైరెక్టర్ల బోర్డు ఆమోదం తెలిపింది. ఈ ప్రతిపాదనకు వాటాదార్ల అనుమతిని తీసుకోవాల్సి ఉంది. ‘దేశీయ విపణిలో ఒకటి లేదా 12 వరకు విడతల్లో సెక్యూర్డ్‌/అన్‌సెక్యూర్డ్, రెడీమబుల్, పన్నుతో కూడిన/పన్ను రహిత, క్యుములేటివ్‌/నాన్‌ క్యుములేటివ్‌ ఎన్‌సీడీల జారీ ద్వారా రూ.12,000 కోట్లను సమీకరించే ప్రతిపాదనకు డైరెక్టర్ల బోర్డు ఆమోదం తెలిపింది. ఈ ప్రతిపాదనపై ప్రత్యేక తీర్మానానికి ఆమోదం లభించిన రోజు నుంచి ఏడాది కాలంలోగా లేదంటే 2025-26 ఆర్థిక సంవత్సరంలో జరిగే తదుపరి వార్షిక సాధారణ సమావేశం తేదీ వరకు ఏదీ ముందైతే అప్పటిలోగా ఈ బాండ్ల జారీ ప్రక్రియ పూర్తి చేయాలని ఆ ప్రతిపాదనలో పొందుపర్చినట్లు’ స్టాక్‌ ఎక్స్ఛేంజీలకు ఎన్‌టీపీసీ తెలిపింది. ఇష్యూ పరిమాణం, కాలపరిమితి, నమోదు వివరాలు (బీఎస్‌ఈ లేదా ఎన్‌ఎస్‌ఈ లేదా రెండింటిలో), కూపన్, సెక్యూరిటీ, ఇతరత్రా వివరాలను ప్రతి ఒక్క విడత ప్రారంభంలో నిర్ణయిస్తామని పేర్కొంది.