మేలో కీలక రంగాల వృద్ధి 6.3%

దిల్లీ: మేలో ఎనిమిది కీలక రంగాల ఉత్పత్తిలో 6.3 శాతం మేర వృద్ధి నమోదైంది. విద్యుత్, బొగ్గు, సహజవాయువు రంగాలు రాణించడం ఇందుకు ఉపకరించింది. ఏప్రిల్‌లో ఈ 8 కీలక రంగాల ఉత్పత్తి 6.7 శాతం మేర పెరిగింది. ఈ ప్రకారంగా చూస్తే.. ఏప్రిల్‌తో పోలిస్తే మేలో కీలక రంగాల వృద్ధి రేటు నెమ్మదించడం గమనార్హం. బొగ్గు, ముడి చమురు, సహజవాయువు, శుద్ధి ఉత్పత్తులు, ఎరువులు, ఉక్కు, సిమెంట్, విద్యుత్‌ను కీలక రంగాలుగా వ్యవహరిస్తారు. కిందటేడాది మేలో ఈ రంగాల ఉత్పత్తిలో 5.2 శాతం వృద్ధి ఉంది. అధికారిక గణాంకాల ప్రకారం.. ఎరువులు, ముడి చమురు, సిమెంట్‌ ఉత్పత్తిలో ప్రతికూల వృద్ధి నమోదైంది. మరోవైపు మేలో బొగ్గు, సహజవాయువు, విద్యుత్‌ రంగాల ఉత్పత్తిలో వృద్ధి వరుసగా 10.2%; 7.5%, 12.8 శాతం మేర ఉంది. కిందటేడాది ఇదే నెలలో ఈ రంగాల ఉత్పత్తిలో వృద్ధి వరుసగా 7.2%; -0.3%, 0.8 శాతంగా నమోదైంది. శుద్ధి ఉత్పత్తులు, ఉక్కు రంగాల ఉత్పత్తిలో వృద్ధి రేటు 0.5%, 7.6 శాతానికి తగ్గింది.