Nvidia CEO: ఎన్నో టాయిలెట్లు కడిగా: దిగ్గజ కంపెనీ సీఈఓ

Nvidia CEO Jensen Huang | ఇంటర్నెట్‌డెస్క్‌: సాధారణంగా జీవితంలో ఎవరూ నేరుగా ఉన్నత శిఖరాలను అధిరోహించరు. ఎన్నో ఎత్తుపల్లాలను దాటుకుంటూ పైమెట్టుకు చేరుకోవాల్సిందే. అయితే, ఈ ప్రయాణంలో దేన్నీ తక్కువ చేసి చూడొద్దని అంటున్నారు ప్రముఖ ఎలక్ట్రానిక్‌ చిప్‌ల తయారీ సంస్థ ఎన్విడియా (Nvidia) సీఈఓ జెన్సన్ హువాంగ్. చేసే పని చిన్నదైనా సరే దానికి విలువ ఇవ్వాలని, గౌరవించాలని అప్పుడే మనం ఎదుగుతామన్నారు. పని విలువపై ఆయన మాట్లాడిన ఓ వీడియో ప్రస్తుతం నెట్టింట వైరల్‌గా మారింది. కెరీర్‌ తొలినాళ్లలో తాను కూడా ఎన్నో టాయిలెట్లు కడిగానని అందులో ఆయన చెప్పారు.

‘‘నా వరకు ఏ పనీ నాకు చిన్నది కాదు. కెరీర్‌ తొలినాళ్లలో నేను ఓ బ్రేక్‌ఫాస్ట్‌ సెంటర్‌లో పనిచేశా. అప్పుడు గిన్నెలు శుభ్రం చేశా. టాయిలెట్లు కడిగా. ఇక్కడున్న మీ అందరూ కలిసి కడిగినదానికంటే ఎక్కువ టాయిలెట్లు శుభ్రం చేశా. ఆ అనుభవమే నాకు అన్నిరకాల పనులను గౌరవించడం నేర్పింది. దానివల్లే ఇప్పుడు కంపెనీలోని ప్రతీ ఉద్యోగిని సమానంగా చూడగలుగుతున్నా. వారి భుజంపై చేయి వేసి అండగా నిలబడుతున్నా. ఈ ప్రపంచంలో ‘తక్కువ’ అనే పని ఏదీ లేదు’’ అని సీఈఓ హువాంగ్ (Nvidia CEO Jensen Huang) వివరించారు.

స్పందించిన మస్క్‌..

ఈ ఏడాది మార్చిలో స్టాన్‌ఫోర్డ్‌ గ్రాడ్యుయేట్‌ స్కూల్‌ ఆఫ్‌ బిజినెస్‌లో మాట్లాడినప్పటి వీడియో ఇది. తాజాగా దీన్ని ఓ జర్నలిస్టు షేర్‌ చేయగా ప్రస్తుతం ఇది సోషల్‌ మీడియాలో చక్కర్లు కొడుతోంది. దీనిపై టెస్లా, ‘ఎక్స్‌’ సంస్థల అధినేత ఎలాన్‌ మస్క్‌ (Elon Musk) స్పందిస్తూ హువాంగ్‌పై ప్రశంసలు కురిపించారు. తనదైన శైలిలో ఓ పోస్ట్‌ చేశారు. ‘‘కచ్చితంగా ఇదే సరైన ప్రవర్తన..! కొవిడ్‌ వేళ టాయిలెట్‌ పేపర్ల కొరత ఉన్న సమయంలో నేను మా ఫ్యాక్టరీ, ఆఫీసుల్లో వాటిని అందుబాటులో సరిపడా ఉంచగలిగా’’ అంటూ మస్క్‌ రాసుకొచ్చారు.