Byjus Job Cuts: బైజూస్‌లో భారీ ఉద్యోగాల కోత.. కొత్త సీఈఓ ప్రణాళికల ఫలితం!

బెంగళూరు: దేశీయ అతిపెద్ద ఎడ్‌టెక్‌ సంస్థ బైజూస్‌ (Byju's) భారీ పునర్‌వ్యవస్థీకరణకు సిద్ధమవుతోంది. అందులో భాగంగా దాదాపు 3,500 మంది ఉద్యోగులను తొలగించే (Job Cuts) అవకాశం ఉందని సమాచారం. బైజూస్‌ (Byju's) ఇండియాకు ఇటీవలే కొత్త సీఈఓగా అర్జున్‌ మోహన్‌ బాధ్యతలు స్వీకరించిన విషయం తెలిసిందే. ఇది జరిగిన కొన్ని రోజుల్లోనే భారీ మార్పులకు సంస్థ సిద్ధం కావడం గమనార్హం.

తొలగించబోయే ఉద్యోగుల్లో సీనియర్‌ ఎగ్జిక్యూటివ్‌లు సైతం ఉంటారని తెలుస్తోంది. ఫలితంగా ఉద్యోగుల వేతనాల కోసం వెచ్చిస్తున్న వ్యయాన్ని తగ్గించుకోవాలన్నది ప్రణాళిక. అలాగే వివిధ విభాగాలను విలీనం చేసి అన్నింటినీ బైజూస్‌ (Byju's) కిందకే తీసుకొచ్చేందుకు అర్జున్‌ మోహన్‌ ప్రణాళికలు సిద్ధం చేస్తున్నట్లు సమాచారం. ఈ విషయాన్ని మంగళవారం ఆయన కంపెనీలోని సీనియర్‌ ఉద్యోగులకు తెలియజేసినట్లు ఈ వ్యవహారంతో సంబంధం ఉన్న వ్యక్తులు వెల్లడించారు. ఈవారమే ఈ పునర్‌వ్యవస్థీకరణ ప్రక్రియ ప్రారంభమయ్యే అవకాశం ఉన్నట్లు తెలుస్తోంది. నిధుల ప్రవాహంలో ఇప్పటికే ఆటంకాలు ఎదురవుతున్నట్లు సమాచారం. ఈ నేపథ్యంలో వీలైనంత వేగంగా పునర్‌వ్యవస్థీకరణ ప్రణాళికలను అమలు చేసి వ్యయాలను నియంత్రించాలనుకుంటున్నట్లు తెలుస్తోంది.

ఆఫ్‌లైన్‌, ఆన్‌లైన్‌.. రెండు విభాగాల్లో ఒకే స్టాఫ్‌ను ఉంచాలని బైజూస్‌ (Byju's) యోచిస్తున్నట్లు సమాచారం. ఫలితంగా అదనంగా ఉన్నవారిని బయటకు పంపనున్నారు. అనుబంధ సంస్థ ‘ఆకాశ్‌’ సహా విదేశీ వ్యాపారాల్లో ఎలాంటి తొలగింపులు ఉండబోవని తెలుస్తోంది. బైజూస్‌ (Byju's)లో 2021లో అత్యధికంగా 52 వేల మంది ఉద్యోగులు పనిచేశారు. ఇప్పుడు ఆ సంఖ్య 35 వేలకు చేరి ఉంటుందని అంచనా. ఈ ఏడాది ఇప్పటికే పలుసార్లు ఉద్యోగులను ఇంటికి పంపిన విషయం తెలిసిందే.