Gokavaram: తూర్పుగోదావరి జిల్లాలో ప్రాణం నిలిపిన పింఛను!

మానసిక స్థితి సరిగా లేక గది లోపలి నుంచి తాళం వేసుకున్న వృద్ధుడు
రెండు రోజుల తర్వాత పింఛను ఇవ్వడానికి వెళ్లి గుర్తించిన సచివాలయ సిబ్బంది 

వృద్ధుడిని బయటకు తీసుకొచ్చి పింఛను అందిస్తున్న సిబ్బంది 

గోకవరం, న్యూస్‌టుడే: ఇంటింటికి వెళ్లి పింఛను అందించడం ఓ వృద్ధుడి ప్రాణాలు కాపాడింది. రెండు రోజులుగా గదిలోనే చిక్కుకుపోయిన అతణ్ని సచివాలయ సిబ్బంది గుర్తించి బయటకు తీసుకొచ్చారు. తూర్పుగోదావరి జిల్లా గోకవరానికి చెందిన ఆనిమళ్ల వెంకటపురుషోత్తం(64)కు పిల్లలు లేరు. కొవిడ్‌ సమయంలో భార్య చనిపోవడంతో మానసికంగా కుంగిపోయారు. స్థానికంగా ఓ గది అద్దెకు తీసుకొని ఉంటున్నారు. పనులు చేసుకునే ఓపిక లేక పింఛను సొమ్ముపైనే ఆధారపడి జీవిస్తున్నారు. ఆదివారం గది లోపలి నుంచి తాళం వేసుకున్న ఆయన కొంతసేపటి తర్వాత నిద్రపోయారు. లేచిన తర్వాత తాళం ఎక్కడ పెట్టారో మరిచిపోవడంతో గదిలో బందీగా మారారు. అతడు ఉంటున్న పోర్షన్‌ పక్కన ఎవరూ లేకపోవడం, చుట్టుపక్కల ఇళ్లు దూరంగా ఉండటంతో.. ఎవరూ అతడిని పట్టించుకోలేదు. ఒకటో తేదీన (సోమవారం) పింఛను సొమ్ము అందించడానికి సచివాలయ సిబ్బంది వృద్ధుడి ఇంటికి వెళ్లినా తలుపులు వేసి ఉండటంతో వెనుదిరిగారు. మంగళవారం సాయంత్రం మరొకసారి పరిశీలించగా లోపల వెంకటపురుషోత్తం ఉన్నట్లు గుర్తించారు. వెంటనే పంచాయతీ కార్యదర్శి శ్రీనివాస్‌కు సమాచారమిచ్చి గది తలుపులు పగులగొట్టారు. అతణ్ని బయటకు తీసుకొచ్చి రూ.7 వేలు పింఛను అందించారు. బాధితుడికి వైద్య సేవలు అందేలా చర్యలు తీసుకున్నారు.