కడప-రాయచోటి ఘాట్‌లో 6 కి.మీ. సొరంగ మార్గం

ఆకివీడు-దిగమర్రు రహదారికి రూ. 1,200 కోట్లు
హైవేల పనులకు రూ. 4,744 కోట్లతో వార్షిక ప్రణాళికకు మోర్త్‌ ఆమోదం

ఈనాడు, అమరావతి: కడప-రాయచోటి ఘాట్‌ రోడ్డు (గువ్వల చెరువు ఘాట్‌)లో వాహనదారుల కష్టాలు త్వరలో తీరనున్నాయి. ప్రమాదకరంగా ఉండే ఈ ఘాట్‌కు ప్రత్యామ్నాయంగా.. ఆ కొండకు సొరంగం తవ్వి, నాలుగు వరుసల రహదారి నిర్మించేందుకు కేంద్రం పచ్చజెండా ఊపింది. ఇందుకు రూ. 1,000 కోట్లు మంజూరు చేసింది. రాష్ట్రంలో మొత్తంగా 14 జాతీయ రహదారులకు నిధులు మంజూరు చేసింది. రూ. 4,744 కోట్లతో 2024-25 వార్షిక ప్రణాళికకు రహదారి రవాణా, జాతీయ రహదారుల మంత్రిత్వ శాఖ (మోర్త్‌) ఆమోదం తెలిపింది.

• కర్నూలు-చిత్తూరు ఎన్‌హెచ్‌లో భాగంగా కడప-రాయచోటి మధ్య ఉన్న ఘాట్‌లో 6 కి.మీ. మేర సొరంగం నిర్మించనున్నారు. నాలుగు వరసల రహదారికి వీలుగా ఒక్కటే పెద్ద సొరంగం గానీ, లేక రెండేసి వరసల రోడ్లకు రెండు సొరంగాలు గానీ తవ్వి.. రోడ్లు వేయనున్నారు. వీటికి ఇప్పటికే కన్సల్టెంట్‌ను నియమించారు. ఆ సంస్థ వివిధ చోట్ల బోర్లు వేసి, ఆ కొండలో రాయి ఎక్కడెక్కడ గట్టిగా ఉందనేది అధ్యయనం చేస్తోంది. ఇది పూర్తయ్యాక ఎలైన్‌మెంట్‌ ఖరారు చేసి, డీపీఆర్‌ సిద్ధం చేస్తారు.
• ఆకివీడు-దిగమర్రు మధ్య 40 కి.మీ. మేర నాలుగు వరుసల రహదారిగా ఉన్నతీకరించేందుకు రూ. 1,200 కోట్లు మంజూరు చేశారు.
• అమలాపురం-రావులపాలెం మధ్య 32 కి.మీ. మేర రెండు వరుసల ఎన్‌హెచ్‌ నిర్మాణానికి రూ. 630 కోట్లు 
• నూజివీడు-లక్ష్మీపురం మధ్య 47 కి.మీ.లో 2/4 వరసలుగా హైవే విస్తరణకు రూ. 625 కోట్లు 
• అరకు-బౌధార మధ్య 41 కి.మీ. రెండు వరసల రహదారి ఉన్నతీకరణకు రూ. 670 కోట్లు 
• ఆత్మకూరు-వెలుగోడు సెక్షన్‌లో 17 కి.మీ.కు రూ. 139 కోట్లు 
• మాచర్ల, రెంటచింతల, గురజాల బైపాస్‌లు కలిపి 10 కి.మీ.లకు రూ. 35 కోట్లు 
• జీలుగుమిల్లి-పట్టిసీమ-కొవ్వూరు మధ్య 46 కి.మీ. మేర నిర్మించే హైవేలో భాగంగా భూసేకరణకు రూ. 50 కోట్లు కేటాయించారు.
• ఆయా ప్రాజెక్టుల డీపీఆర్‌లు వచ్చే ఏడాది మార్చి నాటికి సిద్ధం చేయాల్సి ఉంటుంది.