మహిళా కార్యదర్శులకు పోలీసు బాధ్యతలు.. ప్రభుత్వ నిర్ణయంలో ఏదైనా పురోగతి ఉంటే చెప్పండి

పిటిషనర్లు, ప్రతివాదులకు సూచించిన హైకోర్టు

ఈనాడు, అమరావతి: గ్రామ, వార్డు సచివాలయాల్లోని మహిళా సంరక్షణ కార్యదర్శులను పోలీసులుగా పరిగణించాలని గత ప్రభుత్వం తీసుకొచ్చిన జీఓ, చట్టాన్ని సవాలు చేస్తూ దాఖలైన వ్యాజ్యాలపై విచారణ మూడు వారాలకు వాయిదా పడింది. ఈ వ్యవహారంపై కొత్త ప్రభుత్వ నిర్ణయంలో ఏదైనా పురోగతి ఉంటే తెలపాలని పిటిషనర్లు, ప్రతివాదులను హైకోర్టు సూచించింది. ఈ పిటిషన్లపై తీర్పు రిజర్వు అయినప్పటికీ వాటిని మళ్లీ విచారించాలని ధర్మాసనం నిర్ణయించింది. న్యాయమూర్తులు జస్టిస్‌ యు.దుర్గాప్రసాదరావు, జస్టిస్‌ వెంకట జ్యోతిర్మయితో కూడిన ధర్మాసనం బుధవారం ఈ మేరకు ఉత్తర్వులిచ్చింది.